Pick up the pick-up (truck)

Über Nacht isch en zimliche Sturm über Vancouver zoge, wo üs uf de ganze Granville Island de Strom abgstellt het. Dass de Strom erst am Morge wieder cho isch, het üs zum Glück gar nid gross intressiert, da mir eifach nuno üsen wohlverdiente Schlaf iizoge hend (Jetlag juhee…).

Bi Fraserway hemmer den bald de Schlüssel für üsen Pick-up-Truck becho und sind ab uf d Strass. Ersti (und sehr wichtige) Stopp isch de Canada Superstore gsi, wo mir üs mit allem wichtigem für die nächste Täg iideckt hend (sogar glutenfreii CiniMinis, da isch eine happy gsi).
Und denn simmer uf die grosse Strasse vo Kanada und hend üs em Sea to Sky Highway gstellt. Zwei chliini Zwüschestopps a de Shannon Falls und Brandywine Falls hend üs uf die unglaublichi Natur vo Kanada iigstumme, eifach nur traumhaft. Mir hend sogar scho di erste Bäre gseh, de erst aber leider eine wo vome Auto überfahre worde isch (RIP Bär).
Es Plätzli für d Nacht hemmer denn in Nairn Falls gfunde, iibettet ime chline Wäldli und ame Fluss. Nachem iiruume vom Camper  und em demoliere vo de Chüelschranktüre (zum allfälligs Blaming z verhindere werdet ez da kei Näme gnennt, Claudia ischs aber nid gsi ;)) het’s den s erste selber gmachte BBQ gä. De Abig hemmer gmüetlich am Füürli uusklinge la.