Drink and drive

Trotz afängliche Abneigige em Campground gegenüber hemmer herrlich pfuused und s ersti Mal au chli chöne uusschlafe. Nacheme stärchende Zmorge hemmer üs zrugg uf d Strass begä vo Vernon uf Kelowna. Ufeme schnüsige private Campground, iibettet ine Farm, hemmer üses Camperli chöne platziere und sind vom Dave (Red Dog Wine Tours) für üsi privati Wy-Tour abgholt worde. Mit chliiner Tour durch Kelowna hemmer vier tolli Wygüeter (Mt Boucherie, Quails Winegate, The Hatch & Frind estate winery) agstüüred und 18 verschiedeni Wy degustiert (jaaa, mir sind irgendwenn recht besüselet gsii :)). Vom Dave hemmer zuesätzlich ganz viel tolls über Kelowna erfahre, z.B. d Uuswirkige vo de letschtjährige verheerende Waldbränd bis zu private lustige Storys. Vernünftigerwiis het er üs den au wieder wohlbehalte zrugg zum Campground bracht, womer de Abig mit Wäsche und Chille (@Guapalein & Vanessa, hender gseh, dass di 7. Staffle Outlander dusse isch??? :D) usklinge la hend.

Relativ stressig simmer den in Mäntig morge gstartet, will mir bereits 08.45h für die nächsti, buechti Tour abgholt worde sind. Mitm Alain ischs in wunderschöne Myra Canyon gange, womer üs ufd Velos gschwunge (ja mir wüssed, dasmer mit Helm doof usgsehnd…) und e ehemaligi Zug-Linie befahre hend. Det hemmer e atemberaubeni Uussicht chöne gnüsse und hend uf 2x 12km 12 Bruggene überquert und viel spannends us de Erbauigszyt vo dere Zug-Strecki erfahre. Da mir zum Glück no chli prä-Saison sind (und leider s Wetter trotz positiver Vorhersag nid ganz so het welle mitmache – mir ziehnd das irgendwie chli aa, denkemer nu zrugg a Rege in Dubai und Sansibar…), simmer fast ellei ufem Trail gsi und hends so richtig chöne gnüsse. Nacheme churze Zwüschestopp im Mac simmer den wiiter richtig Revelstoke. Ufem Weg dethii hemmer en Abstecher i di herzig Three Gap Valley Ghost Town gmacht (mit Geisterzug – Claudia loved it), bevor mir den üses Plätzli fürd Nacht im Begbie Falls Campground gfunde hend, wo’s ez no es Absackerli mit Marshmallows überem Lagerfüür git :)