Rege, Regetröpfli...

Au wenn mir i de Theorie, so eigentlich doch recht lernfähig sind, hemmers trotzdem ane bracht zum de Rauchmelder bim Zmorge erneut uuszlöse (cheibe luut das doofe Ding…), aber immerhin wüssemer ez scho bestens, wie me de au wieder abstellt ;). Zum das hektische Zmorge verdaue, hemmer üs ufen chliine Spaziergang zu den Begbie Falls begä, en super härzige Wasserfall ganz i de nöchi vo üsem Campground. Nacher isches den wiiter gange uf Revelstoke, womer eigentlich hetet welle e Wanderig uf de Mt Revelstoke mache. Leider het de Petrus aber öpis gege üsi Plän gha, weshalb mer denn halt eifach chli Revelstoke Downtown mit zueghörigem Museum aglueget hend (total schnüsig und chlii wo über d Entstehig vom Ort verzellt het – mängisch fühlt me sich so als wiise Europäer scho eifach schlecht wemer immer wieder list, was die damals mit de Uriwohner gmacht hend…). Fürs Zmittag simmer ime tolle Taco-Lade go esse, wo doch tatsächlich e jungi Frau us Erzinge schaffed und ganz genau weiss, i wellem Huus Claudia ufgwachse isch (d Welt isch mängisch scho sehr chlii). Ufem Weg zum nächste Campground in Golden hetemer eigentlich e wunderschöni Landschaft chöne gnüsse, aber au das het üs de Petrus nid gönnt (sonen fiise Cheib!), defür isch aber en Wiiskopfseeadler über üs drüber gfloge. Unterwegs hemmer d Bear Creek Falls gfunde, en wunderschöne Wasserfall (ja vo dene het’s da es paar ;)), wo mitte im Grizzly-Gebiet liit. Da mir kei Bäreglöggli und kei Bärespray hend, und zu allem ane au no di einzige Mensche wiit und breit gsi sind, hemmer halt mit Dütsch-Rap (Siiidooo) chli uf üs ufmerksam gmacht. Trotz em Rege isch de Wasserfall cheibe beiidruckend gsii und en Grizzly isch üs zum Glück au nid über de Weg gloffe. Liecht durchnässt simmer den wiiter bis Golden (mit überfahrig vo de Zyt-Zone, het üs eifach e Stund vom Tag klaut…) womer de Abig ufem Campground  mit HotDogs (Sidenote – mir hend sit gester au wieder e Küehschranktüre ;)) uusklinge la hend.