uuuuund Action!

De Petrus het endli mal verbarme gha mit üs und de Tag het sunnig und mit wunderschöner Bergsicht gstartet. Bi de Golden Skybridge hemmer üs den Todesmuetig in Giant Canyon Swing gwagt und hend üsen Körper ordentlich mit Adrenalin voll pumpet, eifach es unglaublichs Erlebnis. Die grossi Sykbridge isch den fast scho en Pipifatz gsii degege :). I dem lässige Erlebnispark hemmer üs zudem uf de Mountaincoaster und d Mountain Zip Line (mit 65km/h über de Canyon) begä. Bevors zrugg uf d Strass isch, hemmer Golden Downtown unsicher gmacht (2 ganzi Strassene ;)) und endli es Buech mit Gruselgschichtene für d’Äbig am Lagerfüür gfunde. Dä nächsti Halt hemmer denn ganz spontan bi de Wapta Falls gmacht, womer es gmüetlichs knapp 5km wiits Wandertüürli (dur de Matsch – Rege, you know ;)) zum nächste Wasserfall gmacht hend. Bi de beide Touri-Attraktione Emerald Lake und Natural Bridge hemmer au eifach churz müsse halte zum paar Föteli mache und sind den wiiter uf Banff (scho guet simmer nur z zweite im Auto bi üsne wunderbare Gsangskünst :)). Ufem Campground (leider mega Masseabfertigung, defür Wapitis wo vorem Camper dure laufed) hemmer ez mal di wiiter Planig vo üsere Kanada-Reis in aagriff gno.