Katsching

Mir hend üs den in Banff au endli mal erlaubt zum chli länger pfuuse, will mer 2 Nächt a eim Ort bliibet. Guet gstärkt vom Zmorge (ohni Füüralarm, mir werdet immer besser!) simmer den mit em Bus bis as Endi vo Banff gfahre und det d Bow Falls go aluege (juhee mal wieder en Wasserfall :-P). Am Flüssli entlang simmer den gmüetlich zrugg uf Banff spaziert, womer üs vo eim Touri-Lädeli is nächste begä händ (Caudia: wuhuuu Schischiii :-P). Zum Zmittag hemmer üs den e richtig leckeri Double-Double-Pizza (doppelt Chäs, doppelt Salami…. Uh das macht bald rugeli rugeli rugeli a de Hüfte…) gönnt – Sidenote, es GF-Esse isch da in Kanada soo viel eifacher als i de Schwiiz, findsch i fast allne Läde und Restaurants gnueg (und vor allem leckeri) GF-Variantene und es wird doppelt vorsichtig ghandlet, weme seit das es Zöliakie isch.  Demit Claudia ihrem Mami nid doch no ihri toll Canada Goose Jagge chlaue muss, hemmer üs mal in Store begä go stöbere und hend üs dummerwiis beid i Jaggene verliebt. Will de Priis aber halt scho nid so chlii isch, simmer zum drüber na denke zerst mal no mitem Gondeli uf de Berg ufe gfahre zum e atemberaubendi Uussicht uf Banff go gnüsse. Will üs den d Jaggene eifach doch nid zum Kopf uus sind, hemmer halt mal üsi Kreditkärtli chli glüehe la (Katschiiing).. man gönnt sich ja sonst nichts :-P Zrugg im Camper hemmer de Abig ganz gmüetlich mitm Harry Potter uusklinge la.
Üses Fazit vo Banff: schön, aber seeehr sehr touristisch und doch sehr überloffe, mir sind gspannt was üs den in Jasper erwartet.