Icefield Parkway

Früeh am Morge isch üsen Wecker abe (05.30…) demit mir au möglichst viiel Zyt hend, zum de Icefield Parkway vo Banff nach Jasper z befahre. Die Strass (ca. 230km) isch eifach de absoluti Traum, me chunt zum Stuune nid use und weiss gar nid, wo überall use fahre zum all die schöne Viewpoints azluege (mir listet die nid all uuf und lönd eifach Bilder für sich spreche, wer möcht wüsse was wo gsi isch, darf sich gern melde ;)). Mir sind den bi knapp 0 Grad und Schneefall bereits sehr froh gsi über üsi neue Jaggene (und hend liecht hämisch die andere Touris in churze Hose und Sneaker beäugt), je nöcher mir Jasper cho sind, ischs den zum Glück aber au immer wärmer und sunniger worde. Zum Schluss hemmer no e chliises Wandertüürli bim Five Lake Valley gmacht und churz drufabe üsen herzige nächste Campground erreicht. Det het me üs den uusdrücklich as Herz gleit, im Dunkle de Camper nid z verla, will sie aktuell en Grizzly hend wo znacht durch de Campground dure schliicht (isch bim Guetnacht-Zigarettli scho no chli Herzpöpperle debii gsi). Dank em sunnige und doch recht warme Wetter, het Claudia mal wieder chli chöne d Sunne aabette, während de Hans fliisig de Camper agschlosse und Füürholz gspalte het. Trotz eigentlichem Alkoholverbot ufem Campground, hemmer üs es Gläsli (oder au meh…) vom leckere Rosé us de Wy-Tour in Kelwona gönnt (mir sind so badass ;-P) und de Abig am Lagerfüür mit Marshmallows und Gruselgschichtli uusklinge la. Jetzt grad (Samstigabig) höcklemer gmüetlich im Camper und planed di nächste Etappene nacheme volle Tag i de Laundry, Admin-Arbet und Touri-Lädeli durchstöbere.
Übrigens freued mir üs sehr drüber, das üsen Blog so zahlriich glese und kommentiert wird, richtig schöö chönd mir üsi Reis mit eu allne Teile <3