Ick blicke was, was du nich blickst und das is grün...

De Tag in Jasper het trotz selber gmachte, GF-Pancakes (uuuh da isch öper happy gsi :)) recht turbulent gstartet… Nach so vielne Kilometer uf de Strass hemmer bi üsem Camperli de Ölstand kontrolliert (wie vom Camper-Vermieter empfohle) und festgstellt, dasses a de Zyt weri zums uffülle. Also hemmer, vorbildlich wie mir sind, s Handbuech kontaktiert demit mer au ja s richtige chaufed. So Motoreöl het’s ja a allne Tankstellene, vor allem so eis wie mir brüchtet da mir ja nid di einzige mit some Wägeli uf de Strass sind. Ach wie me sich doch cha tüüsche…. Nachdem mir all Tankstellene und Läde in Jasper abklapperet hend, simmer immerno ohni Öl da gstande, will’s halt wohl doch nid s gängigste isch. Au d Tante bim Camper-Vermieter het kei Ahnig gha, wo mir ez das Öl her bechömed… Tjajajaja…. Aber 375km bis Prince George durch unbesidlets Gebiet ohni Öl isch üs halt doch eher zu riskant gsi, also hemmer mal en Tankwart gfraget was mir da mache chentet. Er het üs grate zu de Autowerkstatt z fahre, die heb am Sunntig zwar zue (ja, mir hetet das Öl gschiider am Samstig kontrolliert, aber simmer ehrlich, mir hend jeglichs Gfühl über d Wuchetäg verlore…), aber allefalls seg ja doch öper dete. Zwar hemmer det niemer aatroffe, usere Garage grad nebedra sind aber Stimmene cho, also het Claudia, frech wie si isch, sich eifach i die Garage begä und die Herre det nach Öl gfraget. Jaa, si hebed scho Öl, aber es seg halt eher es speziells und si glaubet nid, dass si üs helfe chöntet… aber es geschehen Wunder und es isch genau es richtige Öl gsi. Also hend üs die nette Herre eimal üsen Öltank ufgfüllt (für Pizza & Bier) und mir hend üs mit guetem Gwüsse (aber chli spöter als eigentlich planed) zrugg uf d Strass begä.
Underwegs nach Prince George hemmer eimal meh nur chöne stuune über die unglaublichi Natur vo Kanada und hend au ganz viel Bäre gseh. Als Highlight isch üs sogar en chliine, no ganz junge Babybär fast vors Auto gloffe (Baaaaaaabybääääääääär (ja, bitte geeenau soo quiitschig läse wie Claudia das wür uusspreche ;))).
Demit mir nid di ganze 4h am Stuck münd dure fahre, hemmer im Ancient Forest en Zwüschehalt iigleit und sind de wunderschöni Regewald go aluege, wo Bäum stönd, wo bis zu 2000 Jahr alt sind (einigi devo allefalls sogar no älter, das lat sich wohl nur schwer iischätze). Ufem einte Foti unne i de Galeri gseht me als Grössevergliich irgendwo ganz chli e Claudia (also nid will Claudia so chlii isch (also eigentli scho, aber das isch ja nebesächlich), sondern will de Baum sooo gross isch). Eifach es ungalublich iidrücklichs Fläckli Erde womer da gfunde hend.
In Prince George acho het’s den zerst mal es guets Steak zum Znacht gä, bevor mir üs uf de Campground begä hend. Dete simmer di einzige Gäst gsi und hend drum d Gunst vo de Stund gnutzt und sind mal wieder inere richtige Duschi go dusche (also nid das mir ez gstunke hetet, aber es isch scho schön gsi, bim dusche nid müesse de Wassertank und d Wärmipumpi im Blick halte ;)). Wills den leider de ganz Abig in ströme gregnet het, hemmer kei Füürli am Fluss zue chöne mache (de Fraser River, who knows, villicht het’s de Jamie ja doch gä und er het irgendwenn gnueg gha vo Frasers Ridge und isch uf Kanada sini Tante go bsueche und het em Fluss de Name gä?!?!) sonder hend gmüetlich im warme Camper die nächste Campgrounds bis Vancouver Island buecht (wuhuu, die nexte Äbig kei Planig nötig).