Trotz ahaltendem Rege hemmer üs vo üsne Plän nid abbringe la und sind wieder chli richtig Oste nach Barkerville gfahre, es unglaublich herzigs Örtli wo Gschicht zum Lebe erweckt. I dem alte Städtli stönd no über 100 Gebäude us de Zyt um 1880, wo Barkerville es florierends Goldgräberplätzli gsi isch. Durch vieli Schauspieler fühlt me sich fast wie durch d Zyt katapultiert und mir hend ganz viel Iblick is Lebe vo de damalige Zyt becho. So het üs z.B. de Drucker alles über de Prozess vo de Entstehig vonere Ziitig us dere Zyt erklärt (di alte Druckerpressene sind hüt no in Betrieb), de Schmid het über sis Handwerk verzellt (dasmol würklich und nid nur Trink-Tipps verteilt) und mir hend viel über Handel und s Goldgräber-Handwerk dazumals glernt. Für all wo mal i dere Gegend sind, dene chönd mir das sehr as Herz legge, es unglaublichs Stuck Gschicht wome da chan go aluege. Zrugg in Prince George hemmer den au wieder gmüetlich en Abig am Füür chöne verbringe (es isch am Füür eifach schöner gsi wie am Laptop, drumm hender ez länger uf neui Blog-Iträg müsse warte; für all wo sich Sorge gmacht hend, üs gats wunderprächtig und Claudia het de Hans bisher vom Bärestreichle chöne abhalte).
Kommentar schreiben