On the road again

S Motto vom hütige Tag wäri eigentlich „nur Kilometer“ abspuele gsi, demit mir den au ja pünktlich am Samstig morge üsi Fähre verwütschet. De Claudia ihri Schueh hend aber gfunde, dass so en Tag nur uf de Strass langwilig wäri, und hend drum gfunde si müend ez kaputt ga und ersetzt werde. Daher hend mir üs zerst am Morge in Prince George müehsam müsse ufd Suechi nach neue Wanderschueh begä (bi so viel Regewetter und Lauf-Programm wo mir hend, sind Sneakers eifach sehr unpraktisch…). Nachdem mir den endlich neue Schueh gfunde hend (in pink, juhuu) hemmer no rasch Reserve-Öl fürs Auto bsorget und de Küehlschrank bi dere Glegeheit au no uffgfüllt. Mit doch sehr spürbarer Verspätig hend mir den die 414km vo Prince George nach Smithers (höhöhö) in Agriff gno. Mir würed ez eu a dere Stell gerne e super mega krassi Strasse-Story verzelle, aber abgseh vo eim Bär am Strasserand (und wiiterhin fählende Elche) und echli die 3 ??? lose, isch garnid viel passiert (ussert natürli die schöni Natur, aber das wüsseder ja scho ;)). Bim Tyhee Lake Provinicial Park aacho het’s den nuno gheisse Füürli mache, esse und chille… bis den plötzli üses Camperli gfunde het, er muss ez chli vor sich hii pipse…. Zerst simmer devo uusgange, dases de Propangas-Melder gsi isch, weshalb mir üses sorgfältig ufgheizte Camperli dureglüftet (und abküehlt…) hend. Wo den das Pipse nach x Minute eifach nid het welle höre, simmer dem wiiter uf de Grund…. S het sich den usegstellt, dass üs es Propangas uusgange isch und darum de Küehlschrank nüm het chöne chüele (und de darum mit Pipse uf sich ufmerksam gmacht het). Zum Glück hemmer aber no e 2. Fläsche Gas debi :) Isches nid schön, sis Wägeli immer wieder ufs neui z entdecke… ;)
Eigentlich hemmer den no de soebe gschribeni Blog welle online stelle, da mir aber leider kei Internet hend, hender ez halt no bizzeli länger uf die neuste News müsse warte. Und denked dra, wenn wieder mal paar Tag nüt vo üs z ghöre isch – no news are good news ;)