Will üses Camperli nid wett, dases üs mit ihm langwilig wird, heter üs am Mittwoch mal churz e neui Fehlermeldig azeigt «DEF soon empty» (das hemmer den doch mal müsse google und im Handbuech vom Fahrzüüg nahlese). Drum simmer am Dunnstigmorge zerst ade Tankstell go DEF kaufe (hend scho chli schiss gha damer s gliiche Problem wie bim Öl hend…). Isch irgend so es Gmisch wo d’Amis i ihri Göppel inetüend, damit s’Abgas weniger schädlich isch fürd Umwelt (Findet mir e gueti Sach, da mir mit eusem 6.7 Liter Motor und 5.5 Tonnen Gsamtgwicht sowieso nur Blüemli in Himmel ufe pustet ;)). Wo den s Camperli wieder ufgrüstet gsi isch, hemmer üs (mit chliinem Umweg zum no wiiteri Totempfähl aluege) uf de Weg nach Terrace gmacht. Mir hend gwüsst, mir chönd eifach mal richtig Nordweste fahre und den de ersti Highway nä, wo links weg gat, also no worries bezüglich Route. Und mir sind gfahre, gfahre und gfahre, und s einzige Wägli wo mal links weg isch, isch sones Chiis-Strössli gsi (das chas ja nid sii, das gseht nach Schotterpiste us und nid nach highway, also simmer dra verbi). Irgendwenn hemmer gfunde, dass mir scho cheibe lang richtig Norde fahret. Drum hemmer eusi Glaskugle befräget (Google Maps GPS) und siehe da, oh hoppala, zwiit im Norde! Das Chiis-Strössli weri wohl doch de richtig «highway» gsi. Also hemmer churzerhand mitte uf de Strass en U-turn gmacht (isch ja eh kei Sau ume, geschweige denn Elch oder Bär) und wieder retour. Uf de Schotterstrass acho hemmer festgstellt, das es uh schön aber auch cheibe holprig isch. Leider sind all üsi Trinkgläser kaputt gange (RIP Gläser / 2024 – 2024) und üses Camperli isch gstande vor Dreck. Im Lava Bed Provincial Park acho hemmer au zerst mal welle s Visitor Center bsueche, was aber leider zue gha het. Also hemmer nach churzer Internetrecherche (Empfang, juhuu) üs na es Stückli wiiter richtig Weste begä, womer ime herzige Museum über d First Nation de Startpunkt vonere herzige Auto-Tour gfunde hend. S Museum isch sehr schön gmacht gsi (und mer het sich es wiiters Mal nur chöne schäme über die doofe, wiise Europäer wo im 18. & 19. Jahrhundert in Kanada acho sind) und vo det us simmer den vo Ussichtspunkt zu Ussichtspunkt i dem riisige Lavafeld gfahre und hend die tolli Landschaft gnosse (paar Wasserfäll dörfed au da natürli nid fähle). Bim Campground acho hets den defür nuno gheisse Füürli mache, grille & chille.
Kommentar schreiben