Stuune und Schiffli fahre

Vo Terrace uus isches den wiiter gange bis Prince Rupert, die Strecki wird i vielne Reiseführer und au vo Iheimische als die schönsti Route in ganz British Columbia aglueget (de Icefield Parkway isch in Alberta 😉) und mir chönd dem ganze also nid widerspreche. 150km entlang vom Skeena River, wo a de breitiste Stell ganzi 2km misst und me durch verschlungeni Felsspaltene und a schöne Seene verbii chunt, wome eifach au mal cha d Seele baumle la und eifach chli chan sii. In Prince Rupert acho, hemmer üs zerst mal miteme Burger gstärkt, bevor mir üs durch en wunderschöne Trail im Butze Park (ja de heisst würklich so) begä händ. I dem fast scho magisch wirkende Waldstuck simmer üs teilwiis vorcho wie im verbotene Wald (wär de Aragog nid tod, mir hetet fast scho schiss gha er chunt grad ums Egg), den wieder wie imene verwunschene Märliwald. Am See zue hemmer denn no chli Krebsli chöne beobachte und Stei schiffere la (also de Hans) bevors den uf de Campground gange isch, womer de Abig mit chli Wy & Harry Potter nur churz usklinge la hend, willmer für einisch mal früeh is Bett hend müsse.

Und hüt, Samstig, hemmer am 04:30 scho Tagwach gha (phuuu isch das früeh) demit mir au ja rechtzytig uf de Fähre achömed (Euses Ziitfenster für de Check-in isch nur während 30 Minute gültig). Und uf dere höcklemer jetzt, i de Aurora Lounge mit wunderschöner Ussicht uf die Fjordlandschaft vo de Inside Passage und lönd üs die nächste paar Stundene (vieli vieli Stundene) gmüetlich uf Vancouver Island shippere, womer den die nächste Tag verbringe werdet.