Um Mitternacht hets üsi Fähre den nach 16 Stund uf See (also Meer) endli nach Port Hardy gschafft. D Reis ansich isch recht gmüetlich und ruhig verloffe (mir Leserattene hend beid Der Gefangene von Askaban eimal dure glese, zwüsched dure chli pfüüsele und was gesse), nur geg de Schluss hets mal no recht hochi Wellene gä, wo churzzytig chli es mulmigs Buuchgfühl uusglöst hend (aso bi de Claudia, de Hans het das sehr gechillt gno…). Entsprechend müed simmer den nuno uf de Campground grugelet und zügig go pfuuse. Nach leider echli z wenig Schlaf hemmer üs den ufgmacht, Vancouver Island vo Norde nach Süde zur Helfti z durchquäre. Bim Visitor Center in Port Hardy obe hemmer üs noch churz paar Tipps für d Gegend gholt und sind ab uf d Strass. De ersti vo vielne Zwüschehalt hemmer amene herzige chline Strändli iigleit und obwohl mir det scho am Pazifik gsi sind, het’s sich (Ostküste sei dank) irgendwie gar nid so würklich nach Meer agfühlt (de verhangeni Wulchehimmel het sis übrige dezue biitreit). Wiiter isches den uf Telegraph Cove gange, es super schnüsigs chlises Dörfli mit bunte Holzhüüsli uf Stelze inere Bucht mit grad mal knapp 20 Iwohner (trotz Prä-Saison hets glaub bereits meh Touris als Iwohner gha…). En wiitere Zwüschestopp hemmer bi de Elk Falls Suspension Bridge iigleit, womer (wie chentis au anderst sii) en hübsche Wasserfalls usere relativ höche Hängebrugg aglueget hend. De Küste entlang isches den wiiter via Courtenay («churz» Poste im Real Canadian Superstore, das Ding isch so riisig, me müsst meine es sett det alles gä, aber d Suechi nach Grillfolie het üs den doch cheibe viel Nerve und Zyt kostet) nach Cumberland, womer amene herzige See üses Camperli fürd Nacht abgstellt hend. In 2. Reihe hemmer den aber leider gar nid so viel gha vom See und au üsi bisher gwohnti Rueh hets det au nid so würklich gä (cheibe Teenager, aso wo mir i dem Alter gsi sind, wäred mir niiieemals so luut gsi (hüstel, räusper…) – ja mir merked au, dass mir langsam älter werdet (und chli Büenzlis sind)). Mir hend üs den aber trotz dene «Makel» nid devo abhalte la, de Abig am Füür z verbringe. Leider isch aber die Füürstell nid miteme Grillrost uusgstattet gsi und mir hend üs churz mal ratlos aglueget und fast scho schiss gha, dass mir üses Fleisch wohl doch i de Bratpfanne müend mache. Aber für öpis het ja öper vo üüs en Ingenieurs-Abschluss (oder zumindest sowas i de Art :-P), also het s vorhandene Material (Holz) als Grillrost müsse her halte. Ja, de gwitzti Leser under eu het’s villicht scho gmerkt, es Holzgstell ime Füür – das brennt halt früehner oder später. Aber mit viel Energie, Humor, ere Priise Stress bim Znacht koche sowie akrobatische Ilagene zums wakelige Konstrukt zeme z halte, hend mir üsen Znacht wunderbar zuebereitet und de Abig mit vollne Büüch chönne gmüetlich uusklinge la.
Kommentar schreiben