Kalti gschundni Füess

Will die Insle halt doch nid so chlii isch und mir si eimal vo Ost nach West hend welle durchquäre, hets es wiitersmal gheisse Wecker stelle und früeh ufstah. Bi de Service-Arbeite vom Camper hets de Hans denn leider gschafft, sich e chli de Fuess z vertrampe… nach churzem versurre ischs den aber zum Glück schnell wieder besser worde. Übere holprigi, kurvigi aber sehr schöni Strasse simmer den a de Westküste bim Pacific Rim National Park aacho und hend (es wiitersmal) es Visitor Center konsultiert, demit mir möglichst viel tolls i de doch z churzi Tag chönd ine packe. Usgstattet mit neuem Kartematerial hemmer üs den an wunderschöne Kwisitis Wickaninnish Beach begä, womer den, wagemuetig wie mir sind, s ersti Mal i üsem Lebe üsi Füessli (bi 16 Grad Ussetemperatur) in Pazifik ghebet hend (mir sind zum Glück so clever gsi, es Tüechli mit an Strand z nä, aber de cheibe Sand schaffts eifach scho immer überall z sii sobald me nur e bizzeli demit in Kontakt cho isch…). Mit Oh Henry wieder ufgwärmt simmer den wiiters zum Lighthouse Loop, eme wunderschöne Wanderwägli durch en Wald und de Küste entlang mit atemberaubender Uussicht uf Klippene und Wellene. Als nächsts simmer zum Wild Pacific Trail, womer gemäss de Uuskunft im Visitor Center, mit Glück es paar Seeleuene gseh chan. Em Hans sis Füessli het das denn aber irgendwie nid für sone gueti Idee ghalte, aber me isch ja Steibock und het en stuure Chopf und die churz Wanderig wird ja scho irgendwie ga, me muss sich nur iilaufe…. Mhm… bim erste Uusblick ufs Meer het aber au de Indianer im Hans müesse zuegä, dases wohl besser isch, es für hüt guet sii z la, anstatt no die nächste Täg mit Schmerze z riskiere. Also hemmer üs den zu üsem nächste Campground begä, wo wunderschön imene grosse Wald glege isch. Zum em Hans sin Fuess chli schoone (immerhin het d Apothek vo de Claudia erst i de 3. Wuche müsse zum Isatz cho) het sich den mal d Claudia ums Füür kümmeret (Pfadi-Skills sind also no vorhande :-P) und de Znacht zuebereitet. Zum Doris beruhige, em Füessli und em zueghörige Sohn gats wieder guet ;).