Ankunft Victoria

Nachdem mir mal wieder es bizzeli meh hend chöne pfuuse, hemmer üs uf de Weg nach Victoria gmacht, de Hauptstadt vo BC. Im Petroglyph Provincial Park simmer Steizeichnige vo de Uriwohner go aluege, was aber leider nid ganz so beiidruckend gsi isch wie erhofft (aber me sell ja au die chliine Sache schätze, und s Wüsse, dass die Dinger bis zu 1000 Jahr alt sind, lat eim scho no chli stuune). In Chemainus hemmer üs den schön Zyt la und hend das härzige Örtli mit über 40 bemalte Wänd aglueget, vieli züüged vo gschichtliche Begebeheite wie u.a. de first Nation und Kriegszyte.
In Victoria denn aacho, hemmer zerst mal en chliine Kulturschock gha, soo viel Lüüt uf so wenig Platz, das simmer üs i de letschte 3.5 Wuche halt scho nid so gwöhnt gsii…. Au simmer leider chli naiv i die Stadt ine gfahre, will Parkplätz für so grossi Wägeli wie üses inere Stadt vo de Grössi vo Züri halt scho rar gsät sind… Nach langem sueche, womer fast scho ufgä hend, hemmer bizzeli usserhalb vo Downtown doch no es Plätzli gfunde und hend de Bus ab id Stadt gno. De sehr starki Wind und de bewölkti Himmel het üs zwar chli früüre, aber nid vome chliine Stadtbummel abhalte la. Üse Camper hemmer den über Nacht ime herzige Campground, ca. 40 Minute usserhalb vo Victoria chöne platziere und hend vorsorglich für de nächsti Morge (Whale Watching Tour, wuhee) es Taxi früehzytig bstellt.