Free Willy

Zum pünktlich üsi Wal-Tour z erreiche, het’s es wiitersmal gheisse früh aus den Federn. D Abholzyt vom Taxi isch üs mehrfach uf verschideni Arte bestätigt worde (Telefon, Mail, SMS), also simmer recht relaxt parat gstande. 5 Minute bevor das Taxi den het selle cho, isch es SMS mit „Track your Taxi“ cho, womer gseh hend, dases wohl no mind. 35 Minute het… war ja klar das nid alles so glatt chan laufe… es churzes Telefonat bi de Taxivermittlig het den aber wohl gholfe, will de Tracker plötzli azeiget het, daser zu üs use graset isch. De netti, indischi Taxifahrer het üs den versuecht z erkläre, worum er ez spat isch, aber nur Gott weiss was er üs da gnau het welle erkläre (ja da simmer wieder bim indische Englisch…). Er het üs den aber versicheret, er schaffis pünktlich zu de Wal-Tour uf Victoria (waser den au iighalte het!). Ufeme sehr herzige chliine Schipperli mit en huufe dütsche Touris (die sind eifach scho überall ;-P) hemmer üs den ufd Suechi nach Orcas begä, womer ca. 1 Stund wiiter den au gfunde hend (scho cheibe iidrücklich die schöne Tier, au wenn sie sich leider nid so guet zeiget hend wie dazumals in Norwege (liebi Grüessli a dere Stelle a Selina & Roberto, hoff ihr sind ready für eue grossi Tag <3)).  Au wenn Claudia eigentlich e rechti Schiffs-Angst het, het si das chliine Böötli gmeisteret wie e Grossi (nach de Fähre isch das ja en Klacks ;)) und d Tour isch für ihren Gschmack fast scho chli zu schnell verbii gsi. Immerhin hemmer aber ufem Retourweg no paar Robbene gseh :D. S Wetter het fast e chli zu guet mitgmacht, was leider dezue gführt hend dass mir üs beid e bizzeli s Gsicht verbrennt hend (sind üs halt so viel Sunne irgendwie scho noni so gwöhnt…).
Zrugg in Victoria hemmer de Rest vom Tag demit verbracht, die herzige Stadt z Fuess erkunde und z Shoppe (aktuell het’s no Platz i de Köfferli, mal luege wie lang das no ahaltet… ;)). De Abig hemmer üs den in alter Kanada-Manier (mir hend üs scho so richtig dra gwöhnt) no es letschts Mal es Füürli gönnt.