Viva Las Vegas!

Au wenn mir sehr wehmüetig vo Kanada uusgreist sind, hemmer üs doch sehr uf alles vor üs liggende mega gfroit, weshalb au die 3h Flug am Abig nach Vegas rucki zucki dure gange sind (und au d Immigration het eifach zack gmacht, und iigreist simmer gsii, keini 90 Sekunde het das duuret, wenns doch nur immer so wääri…). In Vegas acho, hemmer direkt vom Gepäckband zum Flughafe uus chöne (hemmer so aso au no nie erlebt…) und sind üses Mietwägeli go hole (au det, ane laufe, zack, Schlüssel i de Hand, loos düüse). Dases wieder es roots gsi isch, het üs scho biz gfroit, au wenn de Komfort den doch düütlich tüüfer gsi isch wie i üsem Camperli. Google Maps het üs den s Liechterspektakel so spat i de Nacht irgendwie nüm so welle gönne und het üs e Querstrass wiiter bis zum Hotel gfüührt. Dete hemmer den rasch üses sehr chice Zimmer im 58 Stock (mit Blick uf „the Sphere“) bezoge und sind direkt ad Bar füren Schlummi.
Am Zystigmorge simmer den (für Vegas-Verhältnis) bezyte uf zum die unglaublichi Stadt z entdecke und mir sind eifach nur gflasht gsi (und das scho am Tag….), eifach unglaublich was Vegas so alles z büüte het. Trotz 34 Grad simmer di ganze 7km vom Strip abgloffe (natüterli mit Zwüschestopps in klimatisierte Restis und Shops) und sind ganz froh gsi, simmer nid letscht Wuche da gsi, wos bis zu 44 Grad gha hend (das überlebsch ja nüm…). Nach churzem Zwüschestopp im Hotel zum chic mache (und Drink a de Bar (Engels-Emoji)) simmer den die atemberaubendi Cirque du Soleil Show KA go luege, wo üs 90 Minute völlig in Bann zoge het. Womer s Theater den verla hend, ischs au endli „dunkel“ gsi i de Stadt und mir hend di ganzi Liechtershow, Wassershow und Lüüchtreklamene chöne bestuune. S Bellagio het üs leider gar nid zue geseit und im Caesars hets so viel Lüüt gha, damer nu churz en (wiitere (wieder Engels-Emoji)) Drink gno hend, bevor mir üs den bi üs im Hotel no is Casino gwagt hend (was au us üsere Sicht mit Abstand s schönsti Casino gsi isch). De Hans isch am Glücksspiel sehr skeptisch gegenüber gstande, aber mir hend üs drum schön brav es Limit gsetzt womer ez da chönd verpulvere. Eigentlich hemmer mal anen Tisch welle go Black Jack oder Roulette spiele, aber Claudia het cheibe Froid a dene blinkende und luute Automate gha, also het si bim erste wo si aaglachet het mal 15 Dollar ine la…. und klingelingeling us 15 den grad 145 Dollar gmacht, uuuh da isch eini aagfrässe gsi. Mit ere chliine Glückssträhne het si den doch tatsächlich bi allne 3 Automate en Gwünn use gholt. De Hans isch leider nid so vom Glück küsst gsi (aber er het ja Claudia als Frau, das sett ja lange ;-P) und will mir de Claudia ihres Glück nid no wiiter hend welle uus loote, simmer den halt nuno ad Bar füren Schlummi.
Womer den am Mittwuchmorge miteme liechte Käterli verwachet sind, hemmer (fast scho mit biz Stolz) chöne sege, das mir s vollständige Vegas-Feeling gha hend :D