Gratis-Tag und Bryce Canyon

Nach leckere Tacos als Kater-Zmorge und doch biz wehmüetigem, letschtem dure fahre vom Vegas Strip, hemmer die unglaublichi Stadt verla und hend üs uf gmacht richtig Bryce Canyon. Claudia het sich sehr gfroit, dass de Handy-Empfang im «Nirgendwo» vo de USA doch düütlich besser isch als in Kanada, so het si nämli luuthals d Schwiizer Nati chöne afüüüre (het ja zum Glück ussert em Hans niemer ghört, und de kennt das scho wenn si Fuessball lueget :-P). Wills halt doch fast 4h Weg gsi sind, hemmer üs im Starbucks in Mesquite mal mit chüele Getränk iideckt, und zu üsem Glück het det grad s System biz gstreikt und mir hend vo dere nette Dame hinderem Trese üsi Getränk den gratis becho (wuhuuu). De Urs und de Michele hend üs de Tipp gä gha, unbedingt im Zion National Park en Zwüschestopp iizlegge und will das eh grad am Weg gsi isch und mir üs au mal churz chli hend welle bewege, het sich das grad super abotte. Au det hemmer richtig Glück gha, worum au immer hemmer de Parkiitritt nämli nid mösse zahle (namal wuhuuu). Und chuum simmer durch die kurvige Strasse vom Zion National Park und Red Canyon dure gfahre, hemmer eifach nur no chöne stuune. Es Troimli die Landschaft und sie het üs richtig froidig gstumme, zum denn am nächste Tag de Bryce Canyon go z bsueche. Im Hotel (es Best Western, nüüt spannends wome müsst Fötele, aber immerhin sehr suuber) aacho, hemmer den zerst mal welle no was chliises Znacht esse, das Resti det het aber scho am 9i zue gmacht und mir hend doch au scho viertel vor 9i gha… also Internetrecherche und oh nei, es mached da fast all Restis (viel hets eh nid gha) bis uf 2 am 9i oder sogar scho am 8i zue (mir froged üs nur, worum???). Bi Bewertige vo 3.4 und 4.1 isch den d Wahl ufen Mexikaner gfalle, da chame ja selte was falsch mache….. oh boy, also ehrlich, Claudia het i ihrem Lebe no nie so widerlich gässe, so schlimm, dases mit öppe 3 Zigis het müsse überdeckt werde und si zum würge nüm uus cho isch (jaaa, mir wüssed au, Claudia isch e seehr heikli Esserin aber ehrlich, das het eu all au gruuset, eifach nid essbar), zum Glück het s Lädeli im Hotel no offe gha womer no chli Schoggi becho hend. Em Hans sini Fajitas sind zum Glück einigermasse essbar gsi, aber leider mit viel Peperoni drin, also kei Option für Claudia...

Nachdem mir den länger pfuused hend als planed (hend 3 Wecker überhört, Vegas steckt üs wohl doch no chli i de Knoche…), hemmer üs uuf gmacht, de Bryce Canyon z entdecke. Nach Besichtigung vo viele unglaublich schöne Viewpoints, hemmer üs no ufes chliises Wandertüürli gmacht (6km, sehr schweisstriibend, aber atemberaubend schön). Viel sege mume zu de Bilder glaub nid, die spreched für sich. De Abig hemmer den gnutzt, zum chli Wösch mache und üs erhole, will planed isch, mitte i de Nacht de Sternehimmel im Canyon go aluege, de seg da eine vo de schönste in ganz Nordamerika. Wenns klappet het und mir nid vorher iipfuused sind, chömed d Bilder den im nächste Blog (falls das überhaupt klappet zum Fötele :-P).