Pech-Zyte & Höheflug

Ja was sell me sege… mir hend leider nid ganz so viel Glück gha mit üsem geplante Sternehimmel. Mir sind zwar schö brav bis am halb 2 wach blibe und hend üs mit de Planig vo de wiitere Route in Amerika beschäftiget, hend aber dank dem cheibe Vollmond nid ganz de spektakuläri Sternehimmel gha wie erhofft (Sidenote – mir hend scho gwüsst, dases Vollmond isch und hend (villicht biz naiv) ghofft, dases durch de eifach no schöner wird….). Es het sich zwar tatsächlich glohnt no 10 Minute in Canyon use fahre und chli Sternli luege, gueti Föteli hets aber leider nid gä… jänu, fählende Isatz chame üüs ja nid vorwärfe und mir gebed dem ganze in Hawaii den namal e Chance :)
Bizzeli müed hemmer üs am Fritig denn uf de langi Weg zum Grand Canyon gmacht. Demits nid nur 5h durefahre isch, hemmer im Antelope Canyon es Tüürli buecht, zum die schöne Steiformatione go bestuune. Aber leider het den de Petrus gfunde gha, dases üs eifach zu guet gat und er drum mal chli Rege spendiere möchti. Das het den dezu gführt, dases Sturzfluet-Warnige gä het und üsi Tour abgseit worde isch. Tja, den halt doch direkt in Grand Canyon fahre…
Und de Grand Canyon? Eifach nur wow!!! Nacheme leckere Burger (ja, mir essed da scho nid gaaanz so gsund, isch bisher aber irgendwie au garnid soo eifach gsi…) simmer mit de Meli und em Tobi am Nachbertisch is Gspröch cho, zwei Dütschi wo in New York lebed. Mir hend so viel z babbele gha mit dene, damer plötzli di letschte Lüüt gsi sind. Irgendwen, wo eigentlich scho sit ere Stund zue gsi wäri, isch de netti Herr vo Taverne cho fräge, obs wohl oke isch, wen er ez langsam wür s Liecht lösche und ob mir Security-Begleitig zu de Zimmer zrugg bruuched. Mir sind ja aber scho grossi, drum hemmer das nette Agebot abglehnt und namal es Stündli im dunkle quatscht, bis den doch irgendwen mal Zyt gsi isch fürs Bett.
Für de Samstigmorge hemmer en Heli-Flug buechet (Heli Heli Heli Hey) und sind zwar biz müed, aber ganz ufgregt los. Will de Privat-Flug den doch biz tüür gsi wäri, hemmer de Heli mit 4 Italiener dörfe teile. Zum grosse Glück hend mir aber die beide Plätz vorne bechoo und so de Grand Canyon us bester Sicht chöne bestuune und ganz ehrlich, es fähled irgendwie di passende Adjektiv zum das Erlebnis beschriibe, soooo fantastisch gsi!!
Die 45 Minute Flug sind den leider viel z schnell verbi gange, also simmer das Naturspektakel au no vom Bode uus go bestuune und hend üs vom Shuttel vo View Point zu View Point kutschiere la (zum Laufe isches mit 34 Grad i de pralle Sunne den doch bizzeli zu heiss gsi. Aber 1.5km hemmer trotzdem gmacht ufem Rim Trail, wo scho na biz Herzpöpperle gä het, wenns rechts vom Weg steil s'Loch abgaht). Wow wow wow chame da nur sege! Leider hemmer aber vor luuter stuune irgendwie verpasst, üs mal mit Nahrig iizdecke und so isch de Claudia ihren Bluetzuckerspiegel chli zu rasant in Keller gheit… Also hoppi galoppi ab go esse. Leider het das den nur so mässig gholfe (d Sunne het da wohl au no biz ihres übrige dezue biitreit), also hemmer mal es Päusli im Zimmer müesse iilegge. Nachdem Claudia denn es Stündli pfuused het, isches ihre zum Glück besser gange und mir hend wieder chöne los zieh. Nach es paar wiitere wunderbare Ussichtspünkt hemmer üs es bequems Plätzli für de Sunneuntergang gsuecht und gfunde. Dete hemmer üs gmüetlich anepflanzt und die wunderbari Abigstimmig gnosse bis d’Sunne komplett verschwunde gsi isch.