Wie mir leider scho sit längerem feststelled, rennt die Zyt eifach unglaublich, und so isch s Erlebnis Grand Canyon au scho wieder verbii gsi und mir hend üs zrugg ufd Strasse begä und sind richtig Flagstaff gfahre. Demit Claudia nid namal em Hans sini arme Ohre im Auto muss zeme schreie bim Fuessballmatch, sondern anderi doch au öpis devo selled haa, simmer in Flagstaff ine Sportsbar go d Schwiizer Nati aafüühre. Erstuunlicherwiis isch de Match sogar ufem grösste Bildschirm mit Kommentar übertreit worde (isch aber scho nid s gliich weme nid mitem Sascha cha mitfiebere (Definitiv Team Sascha, beste Spruch ever „weeer hat noch Fingernägel“)). Bizzeli truurig wills halt doch i de letschte Minute nüm für de Gruppesieg glanget het, simmer den wiiter in Oste gfahre. „I de nächi“ vo Flagstaff (also für amerikanischi Verhältnis) sind mir de Barringer-Krater go aluege. Vor ca. 50‘000 Jahr isch det en Meteorit iigschlage und het en Krater verursacht, wo hüt ein vo de best erhaltene weltwiit isch (weme das den cha glaube, bi de Amis isch ja alles immer s besti, s ältisti, s grössti vo de Welt) und regelmässig vo de NASA für Forschig und Training gnutzt wird. Isch aso no zimli iidrücklich gsi, nur die cheibe Hitz vo knapp 38 Grad het üs biz z schaffe gmacht. Also ab is klimatisierte Auto und uf de Route 66 wieder richtig Weste, womer für ei Nacht es Zimmer in Kingman buecht hend. Via Google hemmer den no rasch es Resti fürs Znacht gsuecht und sind bim Thai 66 glandet, wo sehr gueti Rezensione gha het. Det aacho, hemmer zerst biz Bammel gha, ob ez da würklich so guet sell sii, det hetemer aso im Lebe nie ghalte. Mir sind den au tatsächlich di einzige Gäst gsi und de herzigi alti Thai wo üs bedient het, het keis Wort Englisch gred, aber mir hend den doch eis vo de beste (und wohl authentischte) Thai-Currys i üsem Lebe gesse (zum Glück hemmer üs vom erste Idruck nid tüüsche la).
Kommentar schreiben