Gruselwusel

Mit bereits 30 Grad am Morge am 9i hemmer gwüsst, dass de Tag sehr sehr heiss werde wird (sorry a dere Stell id Schwiiz, wemer chentet, mir würed eu vo Herze gern chli Sunne und Wärmi schicke!!!), aber mir hend üs vo dem nid abschrecke la und hend üs ufd Historic Route 66 richtig Weste begä. De hütigi Tag isch ganz im Zeiche vo Geisterstädt und Autofahre gstande (insgesamt 5 Stund hemmers uf de Strasse chöne la tschäddere la). In Oatman hemmer de ersti Stopp iigleit, es herzigs Touriste-Strössli mit historische Hüüser usem 19 Jahrhundert und en huufe freilaufendi Esel, wo chli e Art Geisterstadt setti darstelle. Leider hends aber us allne Hüüser chlini Touri-Lädeli gmacht und so isch de Charme leider bizzeli kaputt gange. Bi 43 Grad Ussetemperatur simmer sehr froh gsi über d Klimaalag im Auto und hend fest ghofft, das üses Autöli nid irgendwo uf dere Historic Route 66 abliit (het aso nid viel Verkehr gha und Schatte het me vergebens gsuecht). De nächsti Stopp hemmer den i de Calico Ghost Town gmacht, eme richtige chliine Geisterstädtli usem spate 19 Jahrhundert mit vielne guet erhaltene Gebäude. Zum Glück isch det au d Mine no offe und so hemmer üs chli abchüelig chöne verschaffe i dene dunkle Schächt. Uf de Abig ane hemmers den uf Anaheim is nächste Hotel gschafft, womer ez zum Glück mal es paar Täg chönd bliibe und nid grad wieder nach einere Nacht münd s Köfferli packe. Als wunderbare Tagesabschluss hemmer vom Hotelzimmer uus no chöne s Füürwerk vom Disneyland s ersti Mal bestuune und üs uf di kommende Täg iistimme (wuhuuu, Diiiisneeeeey).