"Use the force Harry" - Gandalf

Churz vor de Aareis nach Anaheim hemmer üs ganz spontan dezu entschide, in LA weniger Sight Seeing zmache (hend üs ja gnueg Lüüt gseit, dass sich das gar nid sooo lohnt) und defür en zuesätzliche Tag ime Freiziitpark z verbringe, also het’s (mal wieder) gheisse früh aus den Federn und ab id Universal Studios. Leider isch de aber uf de andere Siite vo LA glege und mir hend üs eimal durch das Verkehrchaos müesse dure kämpfe (zum Glück simmer nid ständig i so Grossstädt mitem Auto underwegs, das wür üsi Nerve den doch ufe grossi Prob stelle). Dank de Claudia ihrem Gwünn in Vegas hemmer üs defür dete eimal d Express-Lane gönnt und hend üs so chillig a allne wartende Lüüt chöne verbii stähle und pro Bahn maximal 5 Minute müesse warte (jaa, biz dekadent, aber au sehr geil :-P). Dadurch hemmer fast all Bahne 2x chöne mache und de Tag so richtig uusnutze. Einzig d Mario Cart Bahn im Nintendo World het üs nid vollends überzüügt, aber he, mir hend ja nid (wie anderi) fast 2 Stund müesse defür astah, de ganzi Rest isch eifach genial gsi. Natürli hemmer üs au no uf e chliini Studio-Tour begä, womer viel Film-Sets hend chöne aluege, Promis hend sich aber leider keini zeiget. Mir hend zerst au scho biz schiss gha, damer i somene Park e Tonne a Merchandise chönd chaufe (Harry Potter, you know ;)) und somit üsi Koffere doch langsam as Limit chömed, aber (leider) isch s Agebot nid sooo gross gsi und mir hend (villicht zu üsem Glück) nur wenig kauft.
Will mir üs den aber doch no biz LA-Feeling hend welle gä, simmer am nächste Tag i die Stadt ine (aso richtig Hollywood) und hend dete d Big Bus Tour gmacht. Und ja, was sellemer sege… s hend all recht gha ;). Mir hend en chliine Spaziergang am Strand entlang bim Santa Monica Pier gmacht, hend (vo wiitem) s Hollywood-Schriftzeiche gseh, hend s Hotel gseh wo d Whitney Houston gstorbe isch und Schuelene wo en huufe Promis gross worde sind, sind churz durch de Rodeo-Drive gschlenderet (gar nid üsi Welt, mir sind lieber i de Freiziitpärk dekadent anstatt mit Designer-Klamotte) und hend Sternli ufem Walk of Fame aaglueget. De Tag isch toll gsi, das aber nid unbedingt weg de Stadt, sondern will mir halt eifach zwei Tolli sind wos schön mitenand hend, egal womer sind (mir sind ja so bescheide ;-P). Leider het de Big Bus den früehner Fiirabig gmacht als üs kommuniziert worde isch, de hemmer halt no es Uber müsse nä zum Auto zrugg. De Abig uusklinge la hemmer bime richtig guete Stuck Fleisch (das chönd die cheibe Amis eifach scho) und eme leckere CrocTail (uuh da het s Chind i üüs Froid gha bim Spielzüüg zum Alkohol :-P).