San Diego

Zum Glück isch üses Hotel sehr zentral gsi, sodass mir eigentlich fast alles eifach und schnell z Fuess hend chöne erreiche. Im Gaslamp Quarter hemmer den au schnell öpis leckers (glutenfreii Waffle, wuhuu) zum Zmorge gfunde und hend üs für de Tag gstärcht. Mir hend planet gha, ein Tag mit Shoppe und eine mit Sight Seeing und Bädele am Strand z verbringe. Also hemmer üses Auto gschnappet und sind bis churz vor Tijuana ines Outlet düüsed. De mexikanischi Ischlag hemmer zimli gmerkt und um üs ume isch fast nur spanisch gred worde (aber üs verstaht me ja eh nid, egal was si rundume redet, das hilft bim lästere ;-P). Zum Glück hemmer üs doch no chli chöne zrugg halte (huuiii chent me det eis Geld ligge la….), es zuesätzlichs Köfferli (Handgepäcksgrössi) isch aber doch langsam notwendig worde.
Zrugg in San Diego hemmer den irgendwie gar nüm gross Lust gha, no viel z undernä (so fast 6 Wuche reise merkt me halt doch irgendwen i de Füess…) und sind drum no gmüetlich inere Rooftopbar am Hafe es paar Drinks go nä (uiuiuiui sind mir besüselet zrugg is Hotel (Engelsemoji)). Entsprechend simmer am Mäntigmorge mit echli Kopfweh verwachet… aber mir sind ja da zum öpis erlebe und nid zum im Hotel ume lungere, also hemmer üs ufgrafft und sind druflos (leider het aber s Wetter nur so halbe mit gmacht, zwar nur wenig bewölkt und viel Sunne, aber mit „nur“ 22 Grad bizzeli z chalt zum em Pazifik wieder hoi sege…). Ersti Station isch d USS Midway gsi, en riisige Flugzügträger wo bis 1992 in Betriib gsi isch, cheibe iidrücklich das Ding und würklich sehr empfehlenswert weme mal da i de Umgebig isch. Zum Glück weiss de Hans so viel über d Flügerei (wer ja schlecht, wenns nid so wär….) und het de Claudia drum ganz viel chöne erkläre und zeige. D Zyt isch grennt und plötzli isch scho spätere Namittag gsi, also hoppi galoppi zum nächste Programmpunkt. Will’s ja leider in Seattle nid klappet het mit some Amphibie-Fahrzüg es Tüürli z mache, hemmer das in San Diego naa gholt. Sehr es lustigs Gfühl, weme mit eme Bus den plötzli is Wasser ine fahrt :D Mir hend den au richtig Glück gha und en huufe Seeleuene gseh (und bevor mirs gseh hend, hemmers gschmöckt, phuuu was füres Düftli wo die abgänd…). I de Top Gun Bar (orginal Drehort vo dere Piano-Szene im erste Teil) het’s aber leider kei glutenfrei Menüs gha, und so hemmer üs öpis anders müesse sueche…
Zum Tagesabschluss simmer den no ane Ghost Tour, womer mit eme chliine Grüppli und enere tolle Erzählerin durchs Gaslamp Quarter gloffe sind und viel lustigi, spuuki und historischi Gschichte über San Diego erfahre hend (wie chent’s au anderst sii, sone Hafestadt isch frühener e Hochburg gsi für Opium und Prostitution… het glaub kei Story oder es Gebäude gha, wo’s nid um das gange isch…). Und zack, isch die Zyt in San Diego scho wieder verbi gsi, für üsen Gschmack den doch leider zu schnell und eigentlich hetemer gern no en wiitere Tag i dere tolle Stadt verbracht (au wenns eim i gwüssen Eggene amigs scho chli zwiilichtig vorcho isch, vor allem wenn eine a dir verbi lauft und seid «laufed ja nid die Strass wiiter, da obe fuchtlet eine mitere Knarre umenand»).