San Francisco

Leider isch üsen Flüger vo San Diego nach San Francisco erst mit über 3 Stund Verspätig gstartet, weshalb’s anstatt fast 3 ganze Täg den nuno 2.5 Täg in San Francisco worde sind. Aber das isch halt und me muss eifach s besti druus mache (wie z.B. die 20. Staffle Greys Anatomy afange luege :D). Nachdem mir’s den irgendwen endli is Hotel gschafft hend, simmer voller Neugier druf los spaziert und via Finanz-Distrikt (vieli hochi Hüüüser) bis zum Pier 39 gloffe. Det unne aacho, simmer froh gsi hemmer Jaggene debi gha, dank em starke Wind hets sich det grad 15 Grad chälter agfühlt…brrr….  Mir hend üs den bime Znacht welle ufwärme, aber wies d Amis halt so hend, isches überall uunglaublich abeküehlt gsi (worum verstönd mir bis hüt nid…). Mir hend den es Plätzli bimene lässige Italiener gfunde, wo de ersti Tag offe gha het und all no so herzig nervös und unsicher aber bemüeht gsi sind. S het sich aber total glohnet (d Claudia isch endlich mal zu ihrne Spaghetti Pesto cho, da gits ja sust hauptsächlich Meatballs oder Alfredo… ez fählt nuno es leckers Risotto, aber wahrschiinli gits das erst i de Schwiiz wieder… hach…). De Tag isch so rasch ume, damer den nuno de Bus zrugg is Hotel gno hend und ab go pfuuse zum fit sii am nächste Tag. Am Mittwuchmorge isch de Wecker nämli mal wieder bezyte abe, zum pünktlich wieder am Pier sii und s Schiff nach Alcatraz z verwütsche. D Tour über die Insle und durch de Gfängnistrakt isch cheibe spannend und iidrücklich, eigentlich würklich es must-see! Leider isch üs aber erst uf de Insle ufgfalle, damer üsi Sunnecreme im Hotel ligge la hend, aber he, wird scho nid so schlimm sii, üsi Huut isch sich ja ez d Sunne gwöhnt…. Uuuh nei, würkli nid, huiuiui…. Ja da het öper nacher en rote Kopf gha… uuupsiii….
Zrugg an Land hemmer üs den in Big Bus gsetzt und chli durch d Stadt kutschiere (und dank em starche Wind) verwuschle la. Uf de andere Siite vo de Golden Gate simmer den uusgstige und hend de Rückweg z Fuess in Agriff gno (höch isch die Brugg, ajajaj….). Uf de andere Siite und bim nächste Bus-Halt aacho, het üs aber de Bus eifach stah la, willer eifach scho meh als voll gsi isch (mit üs no wiiteri 15 Persone, mir hends drum nur halbe persönlich gno :-P). Also isch üs nid viel anders übrig blibe, zum wiiter üsi Füess z nutze, aber demit die den au wieder motiviert sind, hemmer en chliiine Abstecher inere Wy-Bar gmacht (Apero im Schwiizer-Style, so gfallt üs das :D). Ufem Weg zrugg is Hotel simmer no a de berüehmte Lombard Street und eme (wahrschiinli eher weniger berüehmte) Pärkli mit Chile verbii cho.
Am Dunnstigmorge isch de Wecker zum Glück nid so früeh abe und will de Big Bus direkt bi üsem Hotel ghalte het, hemmer üsi gschundene Füessli fürs ersti chli chöne entlaste. D Bus-Tour hemmer vollends uusgnutzt und en huufe über die Stadt erfahre (dases e Yoda-Statue git aber leider biz zu spat erfahre, die isch den nüm drin glege) und viel tolli Stopps iigleit (Full House House, Painted Ladies, Haight Ashbury Street (Hippiiiiies), China Town usw). Nacheme churze Zwüschestopp im Hotel hemmer den eigentlich welle en Cabel Car zude Fishermans Wharf nä, die sind aber de ganz Tag wohl gar nid gfahre und so isch üs die Erfahrig leider nid vergönnt gsi. Immerhin hets gnueg Ersatzbüs gha und mir hend nid müesse laufe. Will den am Abig doch scho sehr viel los gsi isch, hemmer biz länger müesse warte bis mer en Platz bim Thailänder für de Znacht becho hend. Nachem Mampfe simmer denn direkt abe an Pier 39, wo sich bereits en huufe Lüüt, Strassekünstler und Essensverkäufer iigfunde hend (nur d Drink-Ständ hend gfählt, müsstet mal as Lindli-Fäst cho zum luege wie das chent funktioniere :-P). Pünktlich am halbi 10 isch denn für 20 Minute es unglaublichs Füürwerk abgange. Mir hend üs soo mega g’eehrt gfühlt, het San Francisco kei Köste und Müeh gscheut, zum eeextra für üsen Abschluss in San Francisco so öpis ufd Bei stelle!! Nei Scherz, natürli hemmer gwüsst dass Independence Day isch ;). Und ez simmer sowas vo Reif für die Insel und ready für de letschti Drittel vo üsere Reis (läääck, wo isch eigentlich die Zyt ane????). Die nächste Blog-iiträg findet denn uf de Insle vo Hawaii statt *freu*.