Aloha

Mit all üsne Köfferli (mer chönnt meine mir züglet en halbe Hushalt ;)) simmer am Fritig morge mit de BART Metro richtig Flughafe. Drüü Statione vorem Flughafe isch denn aber plötzlich nüt meh gange. Will sogar d’Locals irgendwenn agfange hend umeluege, hemmer gmerkt, dass öppis ned so lauft wie plant. Zum Glück hetts denn verschiedeni Durchsagene geh, wo "alles" erklärt hend (wer kennts nöd? Egal ob Pilote oder Zugfüehrer sobald sie öppis is Mikrofon inehülset, verstaht mer gar nüt meh :P). Zum Glück isch aber nach 25 Minute en Ersatzzug cho und mir hend üsi Reis chöne fortsetze. De Rest vom Weg bis in Flüger ine (@Peter: Boeing 777) isch denn wie gwohnt abgloffe: de gstresste Airlinebeamte de Koffer aneschmeisse (öpper hett nachli en schwere Koffer gha, so dass mir tatsächlich na 1 Pulli hend müesse is Handgepäck näh, damit de Flüger ned abegheit), denn wiit dur de grossi Flughafe duregwaggle bis zum richtige Gate, Pass und Boardingpass zeige und ab id Röhre für die nächste Stunde. Churz nachem Anesitze im Flüger hett Claudia aber realisiert, dass es leider keis on-board Entertainment git, d Netflix-Film-Abelade-und-offline-luege-Funktion het üs aber grettet. Nach de Landig simmer direkt vonere Dame mit Namensschildli empfange worde und hend zwei wunderschöni Lei’s becho (das sind hawaiianischi Blumekettene). Die Überraschig hend de Max und d’Anja eus gmacht (das sind die beide, wo de Mammutteil vo eusere Reis plant und organisiert hend). A dere Stell namal es riiiiiesigs Dankeschön a eu beidi! Nachdem mir euses nächste Mietauto (en schwarze Nissan) gfasst hend, sind mir direkt is Hotel düset, womer en wunderschöne Blick usem Zimmer uf de Pazifik gha hend. Mir hends üs den au nid nä la, de Sunneuntegang mit Füess im Pazifik z gnüüsse und d Abigstimmig ufsuuge. Nacheme schnelle Znacht und de erste Cocktails uf Oahu zu seehr luuter live-Musig (@Selina und Roberto: Sweet Caroline, oh oh ooooooh) simmer den richtig k.o. is Bett gheit.