Natur pur

Nachere kurze Nacht isch denn de Wecker früeh losgange. Schliesslich hemmer trotz üsne Ferie d’Schwiizer Nati wele afüüre. Will na alles zue gsi isch, hetts den halt en "gsunde" KitKat/Snickers Zmorge geh mit Red Bull und Kafi. Nachdem mir den de Schock vom verpasste Halbfinaliizug verdaut hend, simmer los zum mal bizzeli Strand-Feeling gnüsse und hend üs fuul an Waikiki Beach pflöötscht (seehr überfüllt und seeehr touristisch, aber he, nachdem mir ez fast 7 Wuche üsi Badhösli mitumetreit hend, hemmer die endli mal chöne bruche :P). Am Mittag sind mir denn wieder mitem Mietauto unterwegs gsi und hend es paar Sehenswürdigkeite erkundet. Als ersts simmer uf de Round Top Drive (e verschlungeni Strass zmitzt dur de Wald), wo aber leider ab de Helfti denn eifach gsperrt gsi isch…. denn hemmer nachere kurze Wanderig durch en wunderschöne Regewald (de Claudia ihri arme Haar, nass und strubelig und das sogar no ohni gross Bewege…) wieder Mal en Wasserfall aglueget (Manoa Falls) und sind denn zrugg id Stadt gfahre. Mir hend üs für das au extra paar tolli Sache usegsuecht und kontrolliert ob das au ja offe het, sind aber leider chli enttüscht worde will d Agabe im Internet wohl doch nid so gstumme hend (ufem Programm weri de Aloha Tower und s Capitol gstande). Defür hemmer am König Kamehameha (a alli Dragonball Fans, ja de Typ hett wüki so gheisse) sini Statue und s’Künstlerviertel Kaka’ako chönne aluege. De Abig hemmer usklinge lah mitere live Aloha Show am Strand und eme leckere Nachtesse bim Chines.