"Air Raid on Pearl Harbor"

Au am zweite Morge uf Oahu sind mir wieder beziite ufgstande. Mir hend wele früeh bim Pearl Harbor Museum si, damit mir en chliine Vorsprung gegenüber de andere Bsuecher hend. Scho kurz nach de Akunft sind mir dur die historisch Stätt duregloffe und hend vieli Bricht und Infotafle chönne lese. Schnell isch bi eus Gänsehuut ufcho und die isch au nüm so schnell weggange. Miteme Boot vo de US NAVY sind mir den zum Schiffswrack vode USS Arizona bracht worde, wo immerna am gliiche Ort ufem Grund liit, wo sie 1941 gsunke isch. Somit isches ned «nur» es Schiffswrack sondern glichziitig d’Grabstätt vode damalige 1177 Bsatzigsmitglieder. Um die bedrückti Stimmig schnell wieder azhebe, hemmer s’Pearl Harbor Aviation Museum au no aglueget, wo vor allem de Hans wieder viel Flüger zum aluege gha hett :). Claudia hett sich denn als Kampfpilotin imene Full Motion Simulator versuecht und sich tapfer gschlage (de Hans wüür sie grad zum Hauptmaa befördere :-P). Nach em Museumsmorge sind mir denn wiiterdüüset und hend ufem Nu’uana Pali Lookout uf de östlichi Teil vo Oahu chönne abeluege. Was für e Ussicht! Mit stuune isches im Byodo-In Tempel wiitergange, en chliine japanische Fleck zmitzt uf de Insle. Zum eus denn no es biz bewege, simmer binere stündige Wanderig uf em Lighthouse-Trail unterwegs gsi und hend die schöni Landschaft gnosse. Es isch zwar die erst Insle, aber üs gfallt Hawaii scho unglaublich fest. Zrugg im nächste Hotel im Norde hend mir eus as Wäsche und as Blog schriibe gmacht, bevor denn die nächste Highlights uf üsere Reis astönd 😊.