Hai-light

De Mäntig isch zum Start ganz im Zeiche vo Abentüür gstande, also sind mir bezyte usem Hotel los und richtig Westküste düüsed. Bi Hale’iwa (wohl eine vo de bekanntischte Surf-Spot uf de Welt) hemmer üs den todesmuetig mit 5 andere Abentüürer uf es chliies Böötli begää und sind ufs offne Meer use gfahre (trotz de sehr hoche Welle und em ruuche Meer het das de Claudia nüüt us gmacht, si macht das mittlwerwiile wie en Profi und ihri Schiffs-Ansgt isch so guet wie nüm vorhande). Ca. 3 Meile vor de Küste hemmer den üsi Schnorcheluusrüstig bechoo und hend bereits usem Boot use die erste Haie gseh (so richtig wie im Film het nume d Ruggeflosse use glueget, biiiizeli creepy gsi zum wüsse, dases ez den grad zu dene is Wasser ine gat). «Dank» de hoche Wellene isches den gar nid soo eifach gsi, i de bereits schwümmendi Käfig ine z choo, aber mit guet festhebe hets den zum Glück recht guet klappet. Üsi Guides hend den de Käfig vom Böötli glööst und üs chli weg triibe la und mir hend ca. 30 Minute demit verbracht eifach nur z stuune und die unglaublich schöne Tier us de nöchi z betrachte. Es sind sicher öppe 20 Haie nebe und under üüs dure gschwumme und rein theoretisch hetemers sogar usem Käfig chöne streichle (aber üs liit ja scho chli öpis a üsne Händ und Ärm und darum hemmer das nid gmacht ;)). S'retour is Boot stiige isch den gar nid so lustig gsi, und eini vo üs het sehr doof e chli z früeh ihri Taucherbrülle uuszoge und isch eimal (oder au mehrmals) chli duregspüelt worde. Aber es isch eifach es fantastischs Erlebnis gsi, wo leider viiiel z schnell verbi gange isch (da mir leider no kei sones Handy-Hülle-Teil hend zum Föteli under Wasser z mache, gits da halt nume es Symbolbild usem Internet…). Nach dem Actionriiche Tagesstart hemmer den chli öpis ruhigers bruucht und hend üs drum en schöne Strand use gsuecht zum bizzeli chille. Wills den aber leider cheibe viel Verkehr gha het, simmer ganz spontan früehner use gfahre und hend en schöne, (fast) verlassene Strand gfunde zum Sünnele (und chli schlafe, also öper vo üs ;)). Zum Bädele hets sich weg de doch recht höche Wellene leider nid so geignet, defüür hemmer ganz viel Meeresschildkrötli bim lufthole und im Welle-Chaos umewirble chöne beobachte und zu üsem Glück het sich au no eini an Strand verirrt zum chli chille (we feel you turteli, we feel you!). Für de Abig hemmer den nüm wiit vom Hotel weg welle und sind drum nuno bim nöch glegene Marketplace bizzeli go pöstele und go Znachtesse, bevor mir den happy und müed is Bett gheit sind.