Diamond Head

Nach bizzeli uusschlafe (mir mached das da eifach irgendwie z wenig, so reise isch scho cheibe aastrengend…) hend mir üsi Köfferli wieder zeme packt und sind retour richtig Honolulu gfahre, dasmol aber durch d Insle dure und nid de Küste entlang, zum no bizzeli meh vo dem wunderschöne Oahu z gseh. In Honolulu aacho, hemmer den welle go s Capitol aluege, wo im Reiseführer unglaublich toll tönt het (und bim erste Versuech, ufmerksami Leser wüssed das no, leider zue gha het). Det aacho hemmer den aber doch müesse feststelle, dases zwar es tolls Gebäude isch, mir üs aber doch irgendwie meh drunder vorgstellt hend. Jänu, den halt wiiter zum nächste Programmpunkt und ab zum Diamond Head. De grossi Vulkan-Krater isch wohl es must-see da uf Oahu und mir hend üs zum Glück bezyte es Ticket glöst (ohni chunsch nid mal bis zum Visitor Center). Mit gnueg Wasser und Sunneschutz hemmer üs uf die 2 stündig Wanderig (also das hends zumindest mal a gä gha im Reiseführer) und de steili Ufstiig uf de Krater-Rand begä, womer e unglaublichi Uussicht uf Honolulu und Küste vo Oahu hend chöne gnüüse. De Hans het den unedingt no welle wüsse, wo ez die eini Stäge ane gat a dere mir bim Ufeweg verbii gloffe sind (e seeehr steili Stege mit seeeehr vielne Tritt…..) und het Claudia det ufe gschleikt und oh nei, si isch genau det use cho, womer vorher schomal gstande sind (er het ihre das ja nid so ganz welle glaube… Claudia het ihn i dem Moment ca. 1% weniger gliebt für ca. 5 Minute bis si wieder zum Schnuufe cho isch….). De Abe-Weg isch den ganz gmüetlich verloffe und dunne aacho hemmer gmerkt, damer das ganze i nur bizzeli meh als einere Stund gschafft hend (mir sind ja so Maschinene langsam :-P). Im Hotel aacho hemmer üs den zerst mal müesse us rueh und dusche (wuhee, e abnehmbari Duschbrause :D Was hend die Amis nur mit dene fest montierte Brausene, isch doch eifach nid s gliiche…). Zum Abschluss vom Tag hets den no es Drinkli a de Beach Bar und zum Znacht lecker Fleisch bim Japaner Tischgrill gä :D