Nach üsem wunderbare Pflötschi-Tag simmer erholt und voller Energie gsi für di kommende Täg, also hoppi galoppi ab go d Insle erkunde. Ersti Aalaufstell isch s'Spouting Horn gsi, es Fläckli wo durch Lava es Loch i de Küste entstande isch und bi Fluet Wasser „spektakulär“ use sprützt und witzigi Horn-Grüsch macht. Wiiter isches den richtig Waimea Canyon gange, womer scho ufem Weg die unglaublich schöni und grüeni Landschaft vo Kauai hend chöne bewundere (inklusive roter Erde). D Strasseführig isch trotz Landkarte usem Reiseführer nid ganz so klar gsi und so hemmer zerst chli bruucht bismer de ersti offizielli Lookout (und d Kasse, das chame ja nid gratis go aluege) gfunde hend. De Waimea Canyon wird nid umsust de Little Grand Canyon gnennt, het üs grad wieder bizzeli zrugg versetzt nach Arizona, nur ischer da biz grüener. Eifach atemberaubend schön und iidrücklich, was sich da durch Vulkanuusbrüch füre Natur bildet het. Mitte im Canyon hemmer es Resti füres chlises Zmittag gfunde (erstuunlich, bisch irgendwo im Nirgendwo mitte im Pazifik und issisch 1000x besser als im Bryce Canyon….) und hend füren churze Moment s Gfühl gha, mir werdet vo üsem liebe Ramon bedient :D Nach de Besichtigung vo de letschte Lookouts, wo sich wunderschön d Wulche umd Klippene ume gschlunge hend, simmer den wiiter richtig Waimea (go Touri-Lädeli durchstööbere), Kekaha und Hanapepe (de Heimatort vo Lilo & Stitch (@Kussii a mis Eva-Schätzeli dehei <3)). In Hanapepe hets immer am Fritig e chlises Strassefäst, willmer aber no bizzeli z früeh dra gsi sind, hemmer churz „d Attraktion“ vo de „biggest little City in Kauai“, e chline herzigi Hängebrugg, aglueget und hend üs den am Strand no bizzeli Zyt vertribe wo e Robbe (oder Seeleu oder was au immer :-P) sich gmüetlich i de Sunne gwälzt het (so schööö was mir da alles für Tierli us nächster nöchi chönd gseh, d Liste isch scho soo lang :D). S Strassefäst isch den prägt gsi vo lokale Künstler, Food-Trucks und Musiker wo d Stimmig perfekt gmacht hend. Nach eme super leckere BBQ für de Hans und enere super Pizza für d Claudia (Pizza isch lebe <3) simmer zrugg is Hotel womer eigentlich en Schlummi a de Bar hend welle nä. Nachdem mir aber 5 Runde Uno gspielt hend und mehrfach durchs Personal ignoriert worde sind, simmer halt ufgstande (nid ohni das den doch no azspreche bimene Kellner, wo den grad es saumössigs schlechts Gwüsse gha het) und no bizzeli go 4 Gewinnt, Töggeli-Chaste und Säckli-Wirf-Spiili (Cornhole) go spiele (Sidenote – d Claudia het alli Spiiili gunne und isch Stand jetzt die wahrigi Spiili-Königin vo Hawaii :D, nachdem sie Kanada an Hans verlore hett :-P (im Uno...)).
Kommentar schreiben