Matschigi Patscherli

Am Samstig morge hemmer bim Ufstah scho denkt, dass s Wetter nid so de hüüler isch, aber mir sind optimistisch gsi, dass üsi buechti Helikopter-Tour zu de Jurassic Falls trotzdem cha stattfinde. Womer den aber bim Heli-Port acho sind und si scho agfange hend, d Helis in Hangar ine zieh, hemmer gwüsst dases schlecht uusgseht. Si hend den tatsächlich für de ganzi Tag d Tourene absgeit und mir hend für de Mäntigmorge namal umbuecht und hoffed fest, dases den mitem Wetter besser wird (Claudia isch mega entüscht gsi will si so langsam halt scho recht froid het a dere Heli-Flüügerei… de Hans liebt sie trotzdem, au wenn er als Jet-Pilot Heli-Flüüge us Prinzip doof findet (nur so halbe ernst gmeint :-P). Also hemmer üs halt zerst mal miteme leckere Zmorge (Eier-Bacon-Sandwich, so guet dass de Hans grad 2 het müesse esse) gstärcht und en neue Plan für de Tag gmacht. Spontan wie mer sind, simmer den zum Kilauea Lighthouse gfahre, womer chli Vögeli hend chöne beobachte und Küste bestuune. Den simmer wiiter richtig Princeville, was schiins en mega Touri-Hotspot isch, wo üs aber ufgrund vo de villne Hotelalaagene gar nid so gfalle het, also wiiter nach Ha’ena, s Nachberdörfli wo sehr ursprünglich isch und üs düütlich besser gfalle het (da hemmer defür au endli üsi Handy-Hüllene für is Wasser becho).  Wiiter isches den zum Kuilau Ridge Trail, e wunderschöni, 2 stündigi Wanderig mitte durch de Regewald. Au wenns unglaublich matschig gsi isch (mir hend üs zerst no schö g’achtet womer hii stönd, irgendwen het üs das den au nüm kümmeret ;-P) und stellewiis fast nid klar gsi isch, ob ez das würklich so de offizielli Weg isch wills so eng durch Pflanzene dure gange isch, isches eifach nur spektakulär schön gsi und mir hend üs fast chli gfühlt, als wür üs jede Moment en chliine Dino über de Weg laufe (Sidenote – das isch übrigends uf de ganze Insle so, Jurassic Park (und au anderi Filme & Serie) sind da dreiht worde und me gspührt und gseht das überall, mega genial!). Nach de Wanderig simmer sehr froh gsi, hemmer grad bim Auto zue en chline Fluss gha womer üsi Schueh hend chöne wäsche, so hetemer die defintiv nid welle zrugg is Hotel nä :-P. Will denn de Claudia s eine Strand-Kleid in Waimea nid so zum Kopf uus isch, hemmer üs namal uf de Weg dethii gmacht und hend Glück gha, het genau de Lade als einzige no offe gha :D Zum Znacht simmer den churz bi Pacos Tacos verbii (was mir da eis mexikanisch essed, soo fein :D) und sind aschlüssend zrugg is Hotel. Eigentlich hemmer den welle de verpassti Schlumi vom Vortag go nah hole, aber leider isches den de Claudia nüm so guet gange (wer weiss, z viel sunne, z viel gesse….) und drum simmer nuno zrugg is Hotelzimmer wo sie den recht schnell isch go pfuuse und de Hans sich Zyt mit Harry Potter (immerhin scho bim 5. Teil aacho) vertribe het.