Nach fast 10h Schlaf (ach uusschlafe isch sooo herrlich :D) isches den de Claudia zum Glück wieder besser gange und mir sind voll motiviert in Tag gstartet. Leider isch s Zmorge i üsem Hotel cheibe tüür (60.00 $ für bizzeli Toast, Rührei & Speck und Getränk für 2 Persone, eifach nüm so verhältnismässig….), drum hemmer üs mal wieder super gsund und uusgwoge ernährt (niicht :-P Kaffi und Red Bull mit Ufbachgipfeli und trochnem Müesli usem Shop…). Mir hend üs bereits im Vorus es Kayak reserviert und sind drum direkt in Oste vo de Insle düüset zum s Material abhole. Nach churzer Iführig und langer Wartezyt hemmer den das Kayak endli ufem Auto gha und hend chöne zum Istiigs-Punkt fahre. Zum churz vorweg nä, mir hend gwüsst, dases am einte Punkt vo dem Flüssli no mitere Wanderig zume schöne Wasserfall gat und es isch gstande, me sell Schueh mitnä, wo chönd nass werde, das hend mir (i üsere villicht chliine Naivität) ufs Kayake bezoge, also hemmer üsi Flip Flops und Sportschueh iipackt…. Anyway, mir sind den gmüetlich mit gueter Luune und Musig (üsi Handys sind ja ez Wasser-gschützt :D) das Flüssli durab gruederet und hend die wunderschöni Natur bewunderet. Nach knapp 50 Minute simmer den bi dem Ustigspunkt aacho und hend üs uf de Weg zum Wasserfall gmacht, aber bereits nach wenige Minute hemmer müesse feststelle, dass das mit de wasserfeste Schueh halt doch au für die Wanderig gmeint gsi wäri, mir hend nämli mehrfach durch Wasser müesse dure laufe… jänu, de Hans het’s, taff wiener isch, in Flip Flops dure zoge (me will ja di wiise Sportschueh nid grad ruiniere :-P), au wenn de Weg alles andri als Flip Flop tauglich gsii wäri… Claudia het den nachem erste durchquere vom Wasser ihri Turnschue agleit und die halt eimal (resp. mehrfach) dure gspüehlt… Unterwegs hemmer üs den no müesse ame Hüehnli verbii stähle wo de Weg bewacht het (Sidenote – die cheibe Hüehner und Güggel sind eifach üüüberall uf dere Insle, segs uf de Autobahn, i de Hotelalag, nebe de Ikaufsläde, im Regewald, am Strand… niene bisch vor dene sicher….). Immerhin hend sich die Strapazene glohnet, de Weg isch zwar müehsam aber au uh schö gsi und au de Wasserfall het üs sehr gfalle. Nach eme churze und abküehlende Schwumm hemmer üs den de ganzi Weg wieder zrugg zum Kayak kämpft und vo det uus retour wieder de Fluss duruf. Eifach sooo schön isches gsi, mir hend jedi Minute gnosse, au wenns stellewiis cheibe asträngend gsi isch! Im Hotel hemmer den d Gunst vo de Stund gnutzt und namal churz chli gwäsche und a de Bar no üsen Schlummi na gholt (de herzig Kellner von vor 2 Täg het üs den grad wieder erkennt und het druf bestande, üs ez als Wiederguetmachig no en Dessert z spendiere :)).
Kommentar schreiben