Heli, Heli, Heli hey

Womer am Morge ufgstande sind und gseh hend, dass d Sunne schiint, hemmer froidig üsi Sache zeme packt und sind zum Flughafe gfahre zum de am Samstig verpassti Heli-Flug na z hole. Und jupidupiduuu, mir sind pünktlich mit üsem blaue Heli gstartet :D Me cha garnid viel dezue sege, es isch eifach atemberaubend, fantastisch, wunderschön, iidrücklich (etc. etc.) gsi die Insle i ihrere volle Schönheit vo obe chöne z bestuune! De Pilot het sich alli Müeh gä, üs möglichst viel Eggene z zeige, het (für Claudia empfundeni) waghalsigi Manöver gmacht und viel spannends zu de Enstehig vo Kauai verzellt. Viel z schnell sind den die 50 Minute Flug verbi gsi und mir sind richtig gflasht wieder go lande. Mir hend den doch beid müesse sege, dass de Heli-Flug no e schippi druf gleit het im Vergliich zum Grand Canyon. Vom Flughafe uus isches den namal wiiter gange zu de Shipwreck Bay, vo wo us mir e doch eher abetüürlichi und sandigi Wanderig zum Makauwahi Cave gmacht hend. De Weg isch so guet wie nid uusgschilderet gsi und mir sind immer mal wieder plötzli a de Klippe zue gstande und hend nüm gwüsst wie wiiter, bismer denn irgendwo im Gestrüpp oder hinder Felsene de «Weg» wieder gfunde hend. Hii und zrugg hemmer den doch stattlichi 7.5km zrugg gleit, wo sich aber jede Meter glohnt het (au wenn Claudia chli en Clumsy-Claudi-Tag iizoge het und ständig fast «ufd schnurre» gheit wäääri, aber si het ja en starche Maa debi gha wo si gstützt het :D). Und den hemmer dere wunderschöne Insle scho wieder müesse tschüss sege und am viertel vor 5i de Flüger nach Big Island nä (Sidenote – 16.15h sind no Lüüt zum Flüger uus gstige, 16.25h hemmer agfange mitm Boarde und unglaublich aber war, pünktlich 16.45h simmer abghobe, so speditiv hemmer das aso au no nie erlebt :)).  Nach churze 50 Minute Flug simmer den in Kona glandet, hend üsi Köfferli gholt (a dem Flughafe isch alles dusse, me gseht vo de Busstation ufs Gepäckband, mal ganz was anders), sind es nächste Mietauto go abhole (dasmal en rote Jeep 4x4) und ab is Hotel. De Abig hemmer den mit de intensive Planig vo de nächste Täg verbracht, will halt leider üsen Flug uf Maui am 20.07. vom Abig uf de Morge früeh verschobe worde isch und üs so leider ez fast en ganze Tag fählt… aber wie immer i dene Ferie, machemer eifach s besti druus :)