Manta Manta

Will mir ja, wie bereits erwähnt, uf Big Island gar nid so viel Zyt hend und s leider eifach au soo viel z besichtige git, sparemer üs de Luxus vom Uusschlafe bis Maui uuf und sind drum bezyte loos, zum die Insle z entdecke. Nacheme churze Kaffi-Stopp für de Hans hemmer üs eimal quer durch d Insle nach Hilo begä und hend bereits di unterschidliche Vegetatione vo dere Insle chöne bestuune. Vo sehr touristisch und bebaut im Weste, zu karg und vertröchnet mit vielne Lavafelder i de Mitti und sattem Grüen uf de Ostsiite isch eimal alles debi gsi. In Hilo aacho simmer gmüetlich durch d Strassene und de Farmers Market dure gwagglet, hend es Mokupapa Discovery Center mit de Unterwasserwelt vo Papahanaumokuakea (dene vielne Insle oberhalb vo de Hauptinslene vo Hawaii) besichtiget und hend tatsächlich für Claudia ihres schmerzlich vermisste Risotto zum Zmittag becho. De Weg retour in Weste hemmer den via Hamakua Coast gmacht, womer wunderschön durch en botanische Garte und entlang vo de Küste hend chöne düüse. Via Honomu, eme uuh herzige chline Dörfli mit bunte Holzhüüsli (und ere Bäckerei mit glutenfreie Guetzli :-P) simmer churz no ganz bizzeli is Landesinneri gfahre zum d Akaka Falls (jaaaa, mal wieder en Wasserfall ;)) bime churze Rundweg z bestuune (eigentlich ischs üs det meh um de Weg dethii gange wo verschlunge durch de Regewald gführt het). Den simmer wieder richtig Küste und zum Laupahoehoe Beach Park, womer d Ussicht ufd Brandig vom Meer a schwarze Lavafelder gnosse hend. Via Honoka’a isches den bis fast ganz in Norde ufe zum Waipi’o Valley Overlook gange. Vo det uus het me en sagehaft schöne Blick uf es satt grüens Tal mit schwarzem Sandstrand und steile Klippene. Touris chönd das ganze nur vom Overlook us aluege, wills fürd nativ Hawaiianer sehr e tüüfi Bedütig het (wird au es Tal der Könige gnennt). Zyt het den eifach viel z schnell wusch gmacht, und so hend mir zrugg im Hotel nur Zyt gha zum no rasch üsi Sache für de Abig-Usflug packe, bi Dominos Pizza öpis to go z hole und los an Hafe z fahre. Bim Pier hemmer den es chliese Böötli bestige und sind mit 4 lässige und sehr gspröchige Amis so wie üsne 2 Guides ufs offne Meer use düüsed (isch so ganz im Dunkle irgendwie scho no speziell…). Am Ziel aacho hets den gheisse Wet-Suit und Schnorchel montiere und ab is Wasser zum mit de Mantaroche go schnorchle. Und ja, au da, es wiiters Mal während üsere Reis, fähled üs d Wort zum das unglaublich magische Erlebnis z beschriibe. Während ca. 30 Minute hemmer üs, gmüetlich ame Board mit Unterwasserbelüüchtig festhebend, triibe la und die wunderschöne (und abartig grosse) Tier us nöchster Nächi bestuunet. Mir hetet so wohl mit üsne Mitreisende und Guides wie natürli au mit dene Meerestierli no viel meh Zyt chöne verbringe, eifach es absoluts Highlight gsi.