Für üsen 4. Hochzytstag (eieiei wie die Zyt rennt, eifach unglaublich…) hemmer ganz es speziells Hotel ufem aktivste Vulkan vo de Welt, em Kilauea gha. Also (wiedermal) Köfferli packe, de Hans es letschts Mal mit Kona Kaffi versorge und ab uf de Berg. De Weg het üs über d Süd-Route gführt und theoretisch hetis bereits nach wenige Kilometer en (gem. Reiseführer) schöne Ussichtspunkt gha, de isch aber leider so fest und höch verwachse gsi, dass selbst em Hans sini wagemuetige Kletterkünst nid füren guete Usblick glanget hend. Also wiiter bis zum nächste Stopp, de Painted Church, enere herzige chline und bunt bemalte Chile (wies halt de Name scho seit ;-P) wo am Sunntig de Gottesdienst mit Ukulele begleitet wird (hemmer aber, da Dunnstig, verpasst, au wenns sicher mal intressant gsi wär zum so öpis erlebe (au wenn mir nid würklichi Chile-Gänger sind)). En wiitere Zwüschestopp hetemer eigentlich bime hübsche Strand iiplanet gha, will de aber wohl so beliebt und bekannt isch (Instagram sei dank??), hemmer kein Parkplatz becho und hend wieder müesse chehre. Defür hemmer aber no uf de südlichsti Punkt vo de ganze USA chöne luege (tönt ez aber spektakulärer wie dases gsi isch :-P). Churz nachem Mittag hemmer den s Vulcano House uf 1250m ufem Krater obe erreicht und hend den zum Glück au grad chöne iichecke. Nach eme churze Zmittag und eme Abstecher is Visitor Center, hemmer üs ufe churzi Wanderig durch de Sulphur Banks Trail und de Steam Vents begä zum en erste Idruck vo dem Vulkan z becho. Irgendwie isches ganz surreal gsi, z wüsse damer ufeme aktive Vulkan, direkt am Krater zue ume laufed, um üs ume Schwefel-Schwadene zum Bode uus chömed (nid so es feins Düftli gsii wo da use cho isch) und doch überall grüeni Pflanzene, fast scho so als wäremer im Regewald. Mir hend üs den üses Auto gschnappet und sind de Crater Rim Drive West bim zum Schluss abgfahre und hend us verschiedene Winkel chöne i de Krater ine luege. Leider, und da isch halt mal wieder d Natur wome nid cha beiiflusse, het de Kilauea aktuell kei Aktivität zeigt und het nid welle für us blubbere (hetemer soo gern gseh, aber wer ja au langsam frech wenns mit dem ez au no klappet heti nach allem was mir i de letschte 8.5 Wuche hend dörfe erlebe :-P). Bim Lava Tube het sich vor x Jahrene durch heissi Lavaström en Tunnel gformt, wome hützutags cha dure laufe, de hemmer den natürli au no rasch müesse go aluege. Will den aber so langsam üsi Füessli müed worde sind, simmer zrugg is Hotel und hend de Abig gmüetlich mit eme guete Stuck Fleisch und Wy uusklinge la.
Kommentar schreiben