Bergli uf und Bergli ab

Demit mir au möglichst viel no chönd vo dem Vulkan gseh, hemmer halt wieder mal üsi Wecker müesse (dörfe) stelle, sind is Auto ghöcklet und hend de Crater Rim Drive East und d Chain of Craters Road bis zum Holei Sea Arch unsicher gmacht. Uf dene zwei unglaublich tolle Streckene hemmer natürli jede Viewpoint bestuunet wos z bestuune gä het und sind total fasziniert gsi vo dere irgendwie fremd wirkende Umgebig. Mal hets eifach hunderti Meter wiit schwarzi Lavastei-Felder gha, plötzli wieder schöni grüeni Natur und den die breite, erchaltete Lavamassene, wo fast scho uusgeh hend wie en riiiisige, verbrännte Schoggichueche (ohni seich, das gseht würklich so uus). Und überall wachsed irgendwo chlini und grösseri Pflanzene zu dem Lavagestei uus, eifach schön wie sich d Natur immer wieder ihren Weg suecht und findet. Trotz de regelmässige Lavauusbrüch hend Petroglyphe (Steizeichnige) vo de native Hawaiians sit ca. 1200 – 1450 n.Chr. chöne überduure (und vo üs den chöne besichtiget werde). Nach knapp 3h hemmer üs den wieder de ganzi Weg retour uf de Krater ufe begä und sind d Strass richtig Oste wieder obenabe gfahre zum Lava Tree State Monument. I dem chline Pärkli sind Bäum uusgstellt, wo ca. 1790 mit Lava umschlosse worde sind und sit do de Natur trotzed und stellewiis neui Bäum drus use wachsed (het aso no witzigi Formene drunder gha… :)). Wiiter simmer über e sehr lustigi und hügeligi Strass (d Mittellinie am Bode het uusgseh, als het si en Betrunkene gmalet, en klare Fall vo "you had one job" :-P) bis zum Isaac Hale Beach, eme wunderschöne, komplett schwarze Strand und hend dete d Sunne gnosse und de Brandig zue glueget. Ufem Retour-Weg is Volcano House hets den so richtig fest aafange regne (das het den bis zum nächste Morge au nüm ufghört) und mir sind froh gsi, hemmer de Krater am letschte Tag und am Mittag in voller Pracht chöne aluege, jetzt het me nämli keini 50 Meter wiit gseh. Nach eme leckere Znacht bim Thai isch zum 2. letschte Mal Köfferli packe aagseit gsi, will mir am 20.7. die wunderschöni Insle am Morge früeh scho wieder verlönd. Und als ob mir das irgendwie aaziehnd, hend mir mal wieder en Stromuusfall im Hotel iizoge (bereits de 3. während üsere Reis…), aber da mir eh früeh hend müesse ufstah (und üsi Handys und somit au Wecker voll glade gsi sind), het üs das gar nid so fest tangiert.