Mal wieder en Reisetag

Leider hend mir den so richtig früeh wieder use müesse, demit mir üsen Flüger nach Kahului uf Maui verwütschet. Zum Glück hend üsi Köfferli noni s Maximalgwicht erreicht (mittlerwiile simmer ebe scho cheibe Profis im Packe & stopfe :-P) und so hemmers rucki zucki und ohni Problem in Flüger ine gschafft. Nach schnelle 40 Minute hets den scho wieder gheisse cleared to land und welcoooome to Maui :D Bim Autovermieter vo üsem Vertraue, hend mir den üses Auto sogar dörfe uuswähle, und hend den sone komischs, silbrigs mitme Rössli druf gno wo bim Motorstarte so lustig blubberet het (jaa, das het Claudia gschribe, bim Hans wüürs ez heisse: mir hend so en richtig geile Ford Mustang gno mit fette Felge, schöne liechtli, so und so viel ps, bla bla blaa…. :-P), da het me wieder mal de Bueb im Maa gfunde ;). So früeh am Morge hemmer aber noni müesse im Hotel ufschla, also hemmer es Überbrückigs-Programm bruucht. Nacheme leckere und für einisch mal würklich gsunde Zmorge ime Hipster-Kaffi (eifach en Garant für glutenfreis Esse…) so wie eme erbitterte Kampf ums Esse mitme aggressive Hüehnli, simmer is Maui Ocean Center gfahre. I dem chline, aber sehr schöne Aquarium hemmer e gewaltig gueti 3D-Vorstellig über Buckelwal glueget, Turtelis bestuunet und üs d Meerestierli (aso Fisch) vo Hawaii nöcher aglueget. Nach dem spannende Rundgang hets den zytlich wunderbar klappet zum im letschte Hotel uf üsere Reis s Zimmer bezieh (mit wunderschöner Meer-Sicht, aber wieder sone bekloppti festinstallierti Duschbrausi (wie zur Höll sell me da blos de Sand richtig weg bringe????)), üs an Strand z pflöötsche und en Drink (oder zwei…) a de Hotelbar z gnüüse.