Exploring the Island

Am Sunntig hemmer üs den bizzeli meh Schlaf gönnt und hend defür aber Abstrich bim Zmorge gmacht (halt mal wieder chli Assi, aber mir froied üs scho fest uf frische Zopf und Rührei mit Aromat dehei :D). Mir hend den üses Autöli gschnappet (me muss da nid amerke, wer wohl gfahre isch, uuuh da het eine grinsed) und sind eimal quer durch d Insle gfahre zum Oneloa Beach, eine vo de wohl schönste Stränd uf ganz Maui. S Wetter und de Strand sind herrlich gsi, aber leider hets so höchi Wellene gha, damer üs nid würklich is Wasser traut hend (sind aber bim nur am Strand sta, dank de hoche Wellene, trotzdem vo obe bis unne nass und voller Sand gsi). Wiiter isches den nach Makawao, wo’s es herzigs Strössli im Wild West Stiil het zum chli durch d Läde dure stööbere. Leider isch aber wohl s Znacht im Hotel vom Abig vorher doch nid so würklich 100% glutenfrei gsii und drum simmer zrugg richtig Hotel gfahre (Claudia isch den aumal zum Vergnüege cho das Auto z fahre… jaa, macht aso scho no Spass :-P). Nachdems den em Hans gege de Abig zum Glück wieder besser gange isch, simmer i de Nöchi vom Hotel chli durchs Shopping-Virtel dure gwagglet (me chent meine mir seged da nur am Shoppe, sind aber a dem Abig mit leere Händ wieder zu de Läde uus, nur schnoigge isch ja amigs au eifach gmüetlich ;)). Und will’s den di nächste Täg wieder en frühener Wecker gä het, simmer bezyte is Bett go pfuuse.