Und grad namal isch de Wecker so richtig früeh abe (05.00h), aber zum Glück s letschti Mal i dene Ferie. Mir sind zwar cheibe speditiv ufgstande, hend aber vor luuter la mi au mit, de Zimmerschlüssel im Zimmer ligge la. Jänu, de chame ja den am Abig go hole a de Réception…. Ah nei halt, mir chömed so ja garnid zum Parkhuus uus… also namal use, ab ad Réception wo nid bsetzt gsi isch, den de Nachtwächter go sueche, wo zwar cho isch go s Zimmer uftue, aber das inere (bekannte Hawaiianische) Gmüetlichkeit gmacht het, dass üs so langsam Zyt devo gloffe isch. Will mir pünktlich für üsi buechti Tour hend müesse vor Ort sii, isch Claudia de Weg den zimlich offensiv aagange und het (segemer mal usversehe) 1.5 Rotliechter überfahre (zum Glück isch nienets Polizei ume gsi….). Mir hends den grad no so ufd Minute gschafft und hend pünktlich am 7i mit üsere Truppe und 2 coole Guides abgleit und sind mitem Böötli zum Molokini Krater use gfahre. Nachere churze Instruktion hemmer d Schnorcheluusrüstig montiert und sind is erfrüschende Wasser gumped (spötistens da simmer vollends wach gsi) und hend wunderschöni Koralleriff mit ganz vielne schöne und farbige Fischlis chöne aluege. Will die tolle Hawaiianer Stress nid kenned, hemmer chöne so lang im Wasser bliibe wiemer hend welle, bevors den zu de nächste Schnorchel-Spots gange isch (insgesamt 4). S Wasser isch so klar gsi, damer überall e wunderschöni Sichtwiiti gha hend und üs hend so viel tolli und schöni Fischlis krüzt, damer amigs chuum zum Wasser us hend welle. Bim letschte Spot, klar hend si sich s Highlight bis zum Schluss ufgsparet, hemmer öppe 5 wunderschöni und eleganti Turtelis underüüs, nebeüüs, hinderüüs und vorüüs gha, sooooo sagehaft schöö mit den Tierli chöne z Schwümme :D Au wemer das no stundelang hetet chöne mache, hemmer irgendwenn wieder zrugg is Böötli mösse. Defür hets det no es chliises Zmittag und paar lustigi Gschichtene gä, und scho isch üse letschti Usflug vo dere Reis passé gsi… chli wehmüetig aber unglaublich happy simmer den wieder retour is Hotel gfahre und hend üs am Strand vo dene tolle Stundene erholt. Demit Claudia denn nid no i eim Stress i de Schwiiz zum Coiffeur muss vorem Hochzyt am übernächste Samstig (und will me das was si ufem Chopf het scho lang nüm Frisur nenne cha), het si sich im nächste Ort no d Höörli schniide la (und isch mega happy mitem Ergebnis). Grad nebedra hets en huufe Foodtrucks gä, womer üs den bim BBQ und bim Mexikaner was zum Znacht gholt hend, bevor mir de Abig den gmüetlich mit Lese uusklinge la hend und total k.o. is Bett gheit sind.
Kommentar schreiben
Hans und Doris (Donnerstag, 25 Juli 2024 12:37)
Soooo schön, das Meer