The last one

Und da wäremer ez, scho 2 Täg dehei, mit bizzeli Jetlag (und eme chliine Käterli vom 1. August mit Tanja & Lukas) und immerno völlig gflasht vo dere Reis…
Eifach unglaublich, was mir i dene 72 Täg alles hend dörfe erlebe…

2 Länder, 2 Provinze und 5 Bundesstaate
9 Flüg, 4 Airlines, ca. 27'700km i de Luft
2 Fährene, ca. 500 km ufem Wasser
1 Campervan & 5 Mietautos, unterwegs uf gsamthaft 10'440km
71 Nächt, uf 21 Campgrounds, i 16 Hotels und eme Gästezimmer
3 Stromusfäll
2 Mensche, 1 Ziel, ganz viel Liebi und no viiiel meh z lache

Nid z vergesse, alles wome nid chan zelle; all die Kilometer z Fuess, all die wunderschöne Begegnige mit de fremde Tier, die magische Moment wome sich i de wiitii vo de Natur het chöne verlüüre, all die Farbe wo mir im Wald, i de Berge, i de Luft, i de Wüesti, bi Rege, bi Sunneschii, bi Schnee oder ufem, im und am Wasser hend chöne ufsuuge, tuusigi vo herzhafte Lacher, Begegnige mit Mensche us allne Egge vo de Welt, jede mit sinere eigete Gschicht, Kulturene, so viielsiitig wie d Welt!

Ja mir hend es richtigs Abentüür erlebt und während mir di letschte paar Täg in Kaanapali Beach üs d Sunne uf de Buuch schiine la hend, hemmer vieles namal chöne revue passiere la und hend üs namal zrugg troimt uf Kanada und all die schöne Orte womer det hend dörfe entdecke (üsi Gedanke sind grad fest bi Jasper, wo vor paar Tag schlimmi Waldbränd gwüetet hend), hend de Claudia ihren Triumph in Vegas namal gfiiret, hend über üsi lustige Usflüüg in San Francisco glachet und sind mitem Heli namal über Kauai drüber gfloge. Hach… da chame sich drin verlüüre…

Natürli hemmer au di letschte Täg no uusigibig gnosse, nur chame übers Lebe gnüüse am Strand gar nüm soo viel Zeile fülle :-P Mir hend üs aber es wiiters Highlight bis zum Schluss ufghebet und sind am letschte Tag, 12h bevors Taxi an Flughafe isch, no mitenand go Surfe (everybooodys gone suuuurfiiiiin, surfin USAAA :D). Mir 2 hend das gmacht wie Profis und hends tatsächlich gschafft, bim erste Mal bereits ufzstah und paar Meter ufem Brett z bliibe (mir sind soo stolz uf üs :D). Und demits no richtig richtig magisch isch, isch ufem Weg bim use paddle es Turteli gemächlich under üs dure gschwumme und het sich vo üs verabschiedet <3

Und ez, so schad wies isch, und gwüsst hemmers ja immer das de Tag chunt, isches verbi (Puff, wie de Slughorn & Hagrid würed sege…). Aber üsen Rucksack isch gfüllt mit Erinnerige wo üs niemert me chan nä und will’s im hawaiianische gar keis Wort für Tschüss git (si gönd eifach immer devo uus, dasme sich sowieso wieder gseht, hach wie toll isch de Aloha Spirit) hend au mir nid Tschüss gseit zu Hawaii sondern see you soon <3

Last but not least: Es riiiiiesigs Danke a eu alli wo euse Blog glese, kommentiert, verfolgt, beobachtet, mit eus glebt und Emotione teilt hend. Für eus isch durch s Schriibe vom Blog es unglaublichs Tagebuech über eusi Reis entstande, wo ihr eue ganz einzigartig Abdruck hinterlah hend. Mir freuet eus druf, bald wieder bi eu z’si.